mashing na natte magunnani shak takkadaba

Meiteigi chairaoba amasung bangladesh ki shadhinata dibas ka mair leinana BD da leiba Meitei eikhoigi shaktakpada thamjaningba wafamdi,
1. ahanbada Bangladesh joy tousi mathangda world joy tounaba hotnasi
haibadi je kuno thabakta Bangladesh ki jatiya porjaida jounaba hotnaba tai, sannaroi - sportsman amabu oire, Phishabi amabu oire, Doctor amabu oire, lekhak amabu oire, Orthonitibid amabu oire, Ishei nongmai gi kalakar amabu oire, Film Maker amabu oire, developement thinker / activist amadi Humen rights ki activist amabu oire. Bangladesh ki National porjai da meitei ama oina mai paklaba matungda World ta BD gi meitei amani haina chongthoktuna mapham ama kannaba hotnaba tai.

2. Eikhoi gi chatna phathap ngakpaga loinana Bangladesh ki oiba interest tasu maipunana yaosannaba hotnasi

Lamyai da thaabal chongba amasung mandob ta Kang Sannaba ga loinan loinana Cricket, Football, Bedminton, daba na chingba makhal mathel gi sannabadasu mai onsanba tai amasung Bangladesh ki nation gi interest oiba dabi dawa tanliba andolon, sobha somabesh tasun changsanba tai. Mamangai da Meitei singi manungda shannaroi kaya leirammi, thana , jela -bivag porjai gi samaj kormi - rajniti karmi kayasu leirammi. tungdasu leirakkhini.

Mashing likpa akhoigidi Magun na shak takkadabani.

2008-2009 da ikhiba sheireng khara

ইম্ফাল, ঐসু লাক্কনি নোংমাদি


ঐসু লাক্কনি নোংমাদি, ইম্ফাল
হয়িং ওনদুনা তোংলগনি নোংমাদি
এইডস লায়েংশংগী কনা উদ্রবা কা’দুদা ।।

লাক্কনি ইম্ফাল নোংমাদি, কোরাক ওনদুনা
তোংলাগনি তমথিরবা, লান্মীগী নোংমৈ চিদোনদুদা,
শিগনি খংনা খংনা।।

লাক্কনি ঐ নোংমাদি শোয়দনা
কাং ওনদুনা ওইরবসু পাইরক্তুনা
ঈ চুপলগনি, চিকলবা আহিংদা
মফম মরাং খংদনা তাদুনা লৈরিবা লম্বী- লমখাংদা
য়ুঙাওবা অহলশিংগী মতোং য়াওদ্রবা খুবোমদুদা।।

ইম্ফাল, লাক্কনি নোংমাদি শোয়দনা
তুমিৎ ওন্দুনা, তুমিন তুমিন
শুমাং লিলা য়েংলিবা লৈশাবী শিংগী
নাকোং মনাক্তা তমলগনি নুংশি মপাও
তাইবং কনা তাহন্দনা।।

লাক্কনি ইম্ফাল, নোংমাদি শোয়দনা
কাকফৈ ওন্দুনা, কাফৈ কাফৈ
কাবিনগনি ময়ামগা নোংমাইজিং চিংগী চিংদোন্দা।।

ইম্ফাল, নোংমাদি শোয়দনা লাক্কনি,
ঙাখা পুথি ওন্দুনা ওইরবসু
তাওথরক্কনি ইম্ফাল তুরেলদা,
য়েংলগনি, তুমিন তুমিনইনচিংবী শিংগী মওং মতৌ।।

লাক্কনি নোংমাদি শোয়দনা, ইম্ফাল
ক্বাক ওন্দুনা পাইরক্কনি ক্বা-কৈথেলদা,
নোংমাদি
শোইদনা
ঐসু
ইম্ফাল, লাক্কনি।।
````````````````` ০০০০ `````````````````````

পাসপোর্ট

য়েংঙুনে, ইমা!
মখোয়গী অঙৌবা অফিসারসেঐ
গী পাংখোকলা মচুগি পাসপোর্টসে
য়েংলগা, থাজদবা মীৎয়েংদা ঐবু অমুক য়েঙলক্লে

চেনা অনি হাঙদুনা ঐগী মীং অমুক য়েঙলক্লে
চীংনবা অমা মথম্মোয়দা ফাউরকখিবা মানলিনে
মখল মথেলগী মেশীন পুথোকতুনা য়েংলে ঐগী ফোটোসে
নোকফেৎ তৌদুনা করেম্নবা মওংদা ঐবু অমুক্কমুক য়েঙকলে

ঐগী নেমলবা নাতোন
খুরবা মীৎ
অপং শকতা - থাজখিদে

শোয়দোকখিবা মওংদা হাইরকখি, - হাউ কাম! ঐ নুঙাইখিদে

থম্মোয়নুংদা ইদোমতা শোনজখি, কনা তাহনখিদে-
অশংবগী মহুৎতা-
হীগোক!
অমুবা!
অঙাংবা!
অঙৌবা

করম্বা মচুগী পার্সপোর্ট নো ঐবু থাজগদবসে
করম্বা মচুগী পাসপোর্টনা ঐবু শকতাক্কদবসে

পেনদে ইমা, ঐ য়াম্না পেনখিদে
অদুবু, তশেংনদি, শাউনিংখিদে
ইমা
কনাদসু-


((((((((((((((((((((((((((((((০)(((((((((((((((((((


ওয়ান সিক্সটি ফাইভ বস

ওয়ান সিক্সটি ফাইভ বস
অয়ুক্কী থবক চৎপা মতমদা
নুমিৎ খুদিংগী থোংনাউ মপাদ
নংহৌরোই মতৌগুমহোবে হোবে চংশনদুনা ফমলি
সমর
য়ুইন্টর
ফোল
ওটোম

সিজন সিজনগী অহোংবা প্রকৃতিগী শক্তম
থম্মোয়নুংদসু য়ৈরকখি, অদুবু
ঐদি নাচুংদনা য়েংখি
বসকী থোংজাউ হাংবা খুদিংগী, নংতবু
কাউথোকতুনা ওইরবসু,


ঙহাক্কী মংলানবু ওইরবসু,
ষ্টেশন খুদিংগী, নোংমাগী লেপ্তনা-
নং য়াওরমগদ্রা খনদুনা, নংতবু।

নংগী শালুঙাং মচুগী ফনেক
শংবানরবা ফিদুপ, নোকমি নোকমি মাইথোং
নোংমাগী তৎতনা য়েংজখি থোংনাউ মচাদুদা
নিংথমথাগী মমলি-শামলি উবা লৈচিন মরক্ত
লশিং মফোনগুম তারকলবা ঊন মরক্ত
লৈরক খুদিংগী,
ওটোমগী ম্যাপল পাম্বী,
উ-শিংনা মরক্তা
লম্বেল মপানগী পার্ক খুদিংগী,
পাকচাউরবা লমহাং খুদিংদা,
নংবু অমুক্তং উবা ফংগদরা খন্দুনা,
য়েংলি ঐদি নোংমাগী লেপ্তনা-
অদুবু

উখিদে নোংমতসু নংবু!

থম্মোয় শোক্না
বসতগী কুমথবা খুদিংগী নিংশিংহল্লি ঐবু
নখোয়গী থেংলবা অহিং-
নুঙাইনা পোত্থানরবা মতমনি,

নিংশিংহল্লি

সমুদ্র তরেৎকী ওয়াংমদা করম্না লাক্কদগে, নদোমতা
মংদা ওইরবসু, চীঙদোন মাপন লান্ন চৎপা ঙমখিদ্রবা ,
মৈতৈ লৈমা!

তুম্মু ইবেম্মা, পেন্না তুম্মু ঐগীসু য়াওনা!
নিঙোলও

পাকলবা ফমুংদুদা ওনথোইদুনা!

মসিনা নিউইয়র্ককী ওয়ারী নি

ওজা এলাংবম নিলকান্তগি লমকোয় ওয়ারী “ আমেরিকাগা উনবা’’ (২০০১ ) পারুবদা থেংনখিবা ‘চরিত্র’ ময়াম ঐনা নিউইয়র্কতা থুংলরবা মতুংদা অমুক মথং মথং ঐগামুক উনরে। লাইবক থিবা হাইববু ওজা’গী খোংচৎতুদা ঐগা ফংনহৌদবনা (মতমদুদা ঐ নোর্থ আমেরকা’দ য়ৌরকত্রি, আহ! অন্থোকপনিদা।) ঐগী ওয়ারী য়াওহৌদ্রে। করিগুম্বা ওয়ারীদুদা ‘ঐ ’ য়াওরমলবদি ঙসিগী ওয়ারীসে লিরমদ্রবসু য়াবনি।

২০০৩ গী মে’গী তাং তরামাথোই দা নিউইয়র্ককী জ্যাকসন হাইটসতা লৈবা ইমানবা ইন্দ্রজীৎ হোয়দা থুংবনি। ঙসি চহি তরুক মতুংদা অমুক লাকপনি, থুংবসু মখোয়দনি। লাইবক ফবা হাইগদ্রা, ফত্তবা হাইগদ্রা থংনবা এপার্টম্যান্ট অমদা সত্য’দা সু লৈরম্মী। মতম্মগী বাংলাদেশ মনিপুরী ছাত্র সমিতি হৌদোকপদা য়াওরম্বা, বাংলাদেশতা মনিপুরী শিংগী দাবী দাওয়া তানবদা খনাউ চরম কংনা লাউরম্বা সিলেট শিবগঞ্জকি সত্যজীৎ' ইয়াম্বদুগা ঙসি অসিদমুক ফংনররে। বাংলাদেশতগী থুঙলবাগী খরনি মনুংদা জগন্নাথ অমসুং ইন্দ্রজীৎ না হৌদুনা সত্যদা খোইদা চংঙুসি হাইদুনা চংলুই। মনিপুরগী নিঙোন অমাগা য়ুম পান্দুনা তং তানা নিউইয়র্কতা লৈরে হাইনা ঢাকা’দগি সু তারকখি, অদুদা মনিপুর গী ইতৈমাগসু শক খংনজনিংদুনা থেংথবা লৈতনা চাক কৌবা অমদি ফরমাল ইনভাইট কা ঙাইদনা হেক্তা চংশনবনি। করম্না লাক্লী, লাকপগী অওয়া-অনা মথং মথং অচোইবা ওয়ারী শানবা লোইবগা সত্য'দাগী হৌনবী ‘মনিপুরি’ গী সমস্যা, লুচিংবাশিংগি থৌদোক -ওয়াথোক অমদি মনিপুরগী ইরাং মথং মথং ইশিং লিৎতবিদা ঙাংথবা হৌরকই। ঐবু আসামী গী ‘‘কাঠগড়া’’ দা থমলগা হৌজিক্কী লাইরিক হৈবা নহারোল ঐখোয়বু শু মথং মথং শীথবা হৌরকই।

ঐসু ঐনা অঙম্বা খুম্মী, হন্দকসু অমসুং চহি তরুক মমাংদসু। লিদুনা তাহনখি, ঢাকাদ নহারোল শিংনা লৌখৎখিবা থৌরাং, মিটিং - মিছিল, ঢাকাবাসী মনিপুরী, সেন্টার ফর মনিপুরী ষ্টাডিজ (সি এম এস ) কি এক্টিভিটিজ, শৈরাংব মরুপকী (এস _এম ইয়াহু গ্রুপ) ভার্চুয়ালগি জগৎ, খংহনখি ঙসিগী বাংলাগী মৈতৈ নহারোলসু তুমিন্না লৈতে - মাগী মাগি মফমদাগি অঙম অঙম্ব মতেং পাংলকই, থবক তৌরকই। বাংলাগী মৈতৈ নহারোলসু হান্নগী নত্রে, করম্বা মফমদা করি তৌগনি হাইবদুগী ইচং থৌবা থৌদাং লৌখৎলকপা লেপ্তে। খংদে, ময়াম্ন করি খনলিবা, খরা পেনদবদি মানলি। অতৈসু হেন্না আশা লৈরম্ব্রা করিনো ঙসিগী নহারোল দাগী। তাইবং মীগী পেনদবা হাইবদুনি খনলগা তুমিন্না লৈজখি....

অসোমদা আমেরিকাদ য়ৌরকপগী হরাও-নুঙাই, খোইরাও - খোইজাওনরিঙৈ মতমদুদা সত্য’দাগী ওয়ারীদো ঐঙোন্দা থোইদোকনা থওয়াই তানা তানিংখিদে, মপানদা লৈবদুদা ইজাতিবু নুংশিদুনা ঙাংজরিবনি খন্দুনা তুমিন্না লৈথোকই। ঙসি চহি তরুক মতুংদা থুংলরবা মতুংদাসু সত্যদাগী ওয়ারী শিংদু লোইরমদ্রি। আহ!! কনাগী ‘মনিপুরী সমিতি’ , বামযুস, বামসাস, সাংস্কৃতিক পরিষদ, ছাত্র সমিতি, মহিলা সমিতি, ঢাকা’দ মিছিল চৎপগী ওয়ারীদো অমুকসু হৌদোক হৌদোকতুনা পংশাউতা শাউখি। চহি তরুক মখাদ হন্দকসু মন্ত্রিয়লদাগী নিউইয়র্কতা থুংলবাগী খরনি মনুংদা জগন্নাথ, দিলিপ অমসুং বিজন ঐখোয় মরি য়ুরু যুরু চংশনলি সত্যদাগী চাওরবা কা’দু দা। মমাংঙৈগী ওয়ারীসিংদো অমুক্কামুক হৌদোরকই, অনৌবা ওয়ারী হাইববু আমেরিকা’গী ওয়ারিদা ‘নমা’ , ‘ ইমা’ গী ওয়ারীসু য়াওশনলে। অদুগা `` নোর্থ আমেরিকান বালাদেশ মনিপুরী এশোসিয়েশন'' গী আইডিয়া, করি করি থবক পাইখৎলি মদুসু তমহৌদগী কন্না হোৎনরি। ঐসু কৈদৌনি, আঙাং ওইরিঙৈদা ‘‘মেরা পালি ’’ মতমদা ঙমোক চাবগী ঙাইবদা ‘‘ভাগবোত গীতা -রামায়ন-মহাভারত” তাবগী মওং দা খংবা খংদবা, তানিংবা তানিংদবা মাংদা খিল্লিবা অচাপোৎ ময়ামদো উবদা তিন য়োৎলগা খাংলদুনা লৈবগুম মণিপুর ইতৈমাগী হেঞ্জাং অহাওবদো ঙাইদুনা ঙক থুদুনা তুমিন্না তাখি। ইম্ফালগী ইতৈমাগী হেঞ্জাংদো ...........

মরু ওইনা নিউইয়র্কতা লাকখিবদি ইয়ু এন ’গি (জাতিসংঘ) মিটিং অমদা শরুক য়াগে লাকপনি। আদুগি খুদোং চাব লৌরগা বাংলাদেশকী ‘‘বই মেলা’’ অমা নিউইয়র্কতা পাংখোক্কদৌরি, মদুদা ঐখোয়সু শরুক য়াজগে হাইবগী লোবিং তৌবগী মরুপ মপাং থিরকপা অমদি থৌদাং অদুগী থৌপুবা সিংগসু উনজগে হোৎনখিবনি। অঙাং ওরিঙৈদগী হৈনরকপা মিটিং নিবু হাইরদি ইশাগী থবক, ওইজ ওইথক্কা কাউদুনা কোইচৎ চৎপগি লাইনাদো ঙসিসু অসুম থাদোকপা ঙমদ্রি। ইনভাইট অমবু ফংলদি চৎলগে হাইদুনা খোং থাংগত্তুনা লৈরবা ঐসে, চে-চাংগী ঝামেলা খরা লৈবদুনা ইউ এস এ’ গি মফম কয়াদগী ইনভাইট লাক্লবসু চৎপা ঙমদনা তুমিন্না তোকথোক্কি মাংগী চহি তরুক সে, তৌবতবু কানাডা মনুংগী ইনভাইট শিংদী ঙাকনবা হোৎনখি। মসিনা ওয়ারি অমনি। কানাডাগী ওয়ারীদি নোংমা লিজরগে...........................

দেশতা লৈরিঙৈদসু `মেলা' দ চৎপা - কোইবা - চাব’ত নত্তনা মখন মথেনগী পোৎয়োম (প্রডাক্ট )ময়ামগী মনুংদা ঐখোয়গী সু পোৎয়োম খরা হাংলাগা থম্বা, য়োন্বা, শন্দোক’নবা হোৎনরকখি, সিলেট-মৌলভিবাজারগী মেলাদবু ওইরো, ঢাকা’গী মফম কয়াদ, মতম মতম দা তৌখিবা মেলাদবু ওইরো শরুক য়ানবা হোৎনখি। ঙসি নোর্থ আমেরিকাদসু অদুমকনি তৌগে খনলিবা। নিউইয়র্ক, ফ্লোরিডা, টরন্টো, মন্ত্রিয়ল দা নোংমা নোংমাগী বাঙালীসিংগী মশিং হেনগৎলক্লি, অদুগা লোইননা বাংলা সংস্কৃতি য়োকখৎনবাগী থৌদাং ওইনা চহিগী সংস্থান কয়ান শিন-লাংদুনা মখল মথেলগী ইশে-নোংমাইগী অনুষ্ঠান অমদি মেলা কয়া পাংথোকনরকলি। চহিগী নিউইয়র্ক অমদি টরন্টো'দা ‘‘ বাংলা মেলা ’’ অমসুং ‘‘বই মেলা’’ তৌবগী চৎনবী অমা চহি খরনি মমাংদগী সংস্থান কয়ান হৌদোরকখি। নোর্থ আমেরিকা অমদি ইউরোপতা লৈবা বাংলাগী অইবা শিংগী লাইরিক অমদি ঢাকা-কলকাতা দগী পাবলিকেশন্স-পাবলিশার্স কয়াসু মাগী মাগি ফোংবা লাইরিক পুনরকতুনা শরুক য়ারৈ। মদুদা বাংলাদেশতা ফোংবা অতোপ্পা লোনগী অইবা শিংগী লাইরিক সিংদুগি ওইনা স্টোল অমা তোঙান্না শরুক য়াগে হোৎনজবনি। পাউ অসে ঐনা নিউইয়র্কতা লৈবা ময়ামদসু তাহল্লি। বাংলাদেশতগী ইউ এন’ গী মিফম দুদা লাকপা ময়ামদসু খংহনখি। ঢাকাদগী সনজীব দ্রং, নর্থ বেঙ্গলগী রবীন্দ্রনাথ সরেন, সিলেটকী ফ্লোরা তালাং (খাসীয়া ফুরুপ ) অমসুং ফাদার গোমেজ অমসুং চিটাগাং হিল ট্রেক্সতগী রাজা দেবাশীষ রায়, মৃনাল ত্রিপুরা গা লোইনা পুম্নমকনা মিহুৎ তরেৎ লাকখি। অদুগা অষ্ট্রেলিয়াদগী `খুমী' ফুরুপকী অহান্বা মপান লমদা লাইরিক তম্লিবা লেলুং খুমি সু লাকখি, অমসুং শক খংনখি। ময়ামগা বাংলাদেশকী মাইনোরিটিশিংগী ফিভম, ঢাকাদ হৌজিক হৌগৎ লক্লিবা নহারোল শিংগি থৌদাং অমদি এনজিও শিংগী প্রোগ্রাম প্রজেক্টকি মতাংদসু ওয়ারী কয়া শান্নখি। মরক মরক্ত ইন্ডিয়াগী নর্থ ইষ্টতগী লাকপা মিহুৎ শিংগসু ওয়ারি কয়া শান্নখি। মখোয়সু য়াম্মী লাকপদো, মনিপুরদগীসু মিহুৎ খরা য়াওরকখি, মখোয়গী মনুংদা এনজিওগী থৌপুবা, হিউম্যান রাইটস এক্টিভিস্ট কয়াগসু মনিপুরগী হৌজিক হৌজিক্কী ইরাং অমদি অওয়া অনা কয়াগী ওয়ারী শান্নজখি। ওয়ারিদি য়াম্মী, পেনদবসু য়াম্মী, করিনো তৌদোরিবা! নুংশামপি হোল্লগা তোকখি।

ইউ এন’গী মরু ওইবা মিফম শিংদুগী মরক মরকতা মালেমগি কাচি কোয়াদগী লাকপা ময়ামগসু ফংনরুবা ফংনরুবা মফমদা অওয়াব ফোংদোকনৈ, নুংঙাইতবা ফোংদোকনৈ, ‘ রাষ্ট্র’ অমদি ‘পাওয়ার’দ লৈবা শিংনা মিচম-প্রজা অমদি তুশোন্বা-অশোন্বদা ওৎপিরিবা নৈবিরিবা সিংদুগী মরমদা ময়ামদা খংহনবগা লোইননা ইয়ু এন ’গী মাইকৈদগী তৌফম থোকপা থৌদাং লৌবিনবা ময়াম্ন ওয়াকৎচৈ। নিউইয়র্ক্কী ম্যানহাটন’দো খরনিগি ওইনা মালেমগী মফম কয়াদগী লাকপা তুশোল্লবা, নৈহৎপিরবা ময়ামগী নুংশাশ্বরনা পুমথন থনখি। অমরোমদনা অওয়া অনা, অফা-অপুন মরক্তগী লাকখিবা ময়ামদুসু খরনি ম্যানহাটনগী অরং অরাকশিং উবদা অওয়াব-নুঙাইতবা ময়ামদো কাউথোকনবা হোৎনখি। নোংমা নোংমাগী মিফমশিংদো লোইরবা মতুংদা ঐখোয় খরা ব্রডওয়েগী কুমৈ য়েংবা, টাইমস্কোয়ারদা মিয়ামগি মিতৌ য়েংবা, চাইনা টাউনদা পোৎ-চৈ অহোংবা য়েংবা চৎলি। অদুগা ছুটি নুমিৎকী অয়ুক নুংথিলদনা ম্যানহাটন গি আর্ট গেলারী, মিউজিয়ম, পার্ক, স্কাইক্রেপার, নুমিদাং দনা মীতৈ ইমুং অমদি মরুপ মপাং শিংগি য়ুম দা চাক চাব চৎলি। চাকোই চাবসিসু অঙাং ওইরিঙৈদগী হৈনরকলবনি, ফনদুম মহৈনখি।

মথং মথং থেংনরকখি, সিলেটকী দিপু, প্রসেন, অশোক'দা, ভানুগাছ কি কাকা ধৃত, রণজীৎ, শুশান্ত, ইবাই নিরেন অমসুং হাবিব ভাই , গোয়ালবাড়িগী কাকা বিদ্যা, বিশগাওগী কাকা অনিল অমদি সুরেন্দ্র'দা। হাবিবুরনা তম্বিরকই মৈতৈ পাঙলসু য়ামখৎলকই নোংম নোংমগী। চহি তরুক মমাংদাসু অমুক থেংনখিবা ময়ামদো অমুক্কমুক থেংনৈ। ময়াম্না ওয়ারি কয়া লিদুনা তাহনখি মখোয়না বাংলাদেশতা লৈরিঙৈদা করি করি তৌরকখি। নুঙাইতবা ফোংদোকখি থৌদোক কয়াগী, অওয়াব - পেনদবা ওয়ারী কয়াসু তমদুনা তাহনলি। মিরমদম সিদা ঙসিসু মং মংলি বাংলাদেশকী মৈতৈশিংগি নুংতিগী ওইবা অওয়া নুঙাইবদুদা শরুক য়ানিংবাগী। কনা কনাগুম্বনা নোংমাগী তত্তনা ফোন' দা ওয়ারি শান্নরী মমানবা অমদি ইমুং মনুংগী অমগা অমগা। নিঙোন থাজবগী, পিবা লুহোংবাগী, মচিন-মনাউ লাইরিক তমহনবগী, পাশ তৌরকপগী, লৌ লৌবগী- দোকান লৌবাগী, অনৌবা আইডিয়া, অনৌবা মোবাইল ফোন, কনা শিখিবগী, কনা মশা ঙম্দবাগী, করম্বা ইমুংগী নিঙোন কনাদ চেনখরে, ময়াংদ জাত তাখিবগী, ময়াংন লৌ মুনখিবগী, ইশিং ইচাউগী, নোংজু নুংশাগী ওয়ারী কয়ান কোংগোন পিত্রিক কায় ফোনগা ফোনগা। হকচাংনা নিউইয়র্কতা থওয়াইনা বাংলাদেশতা, নিংশিং লকই অদুঙৈগী মনিপুরগি ইশৈদো, থওয়াইন উখ্রুলদা লৈহৌরে..................

শরকতুদা নিনি-হুমনি ওয়াশিংটোন ডিসি দসু কোইথোকলুই। ডি সি দসু মৈতৈ খরা লৈ। মৈতৈ জগোইগী ওজা নবঘন মেম নুপি অমা লৌদুনা ওয়াশিংটনদা তং তাদুনা লৈরে হাইনা ওজা এলাংবম নিলকান্ত নসু ইবিরম্মি। হৌজিক্তি মশিং হেনগৎলে। ঐনা ডি সি দা চৎপগী মরমদি, ট্যুরিজম গি হেড অফিস অমা অদুদা লৈবা, মদুসু চংঙক্কে অদুগা হোয়াইট হাউস, কেপিটোল, মিউজিয়াম্ন চিংবা য়েংনিঙাই খরা লৈবদো লাকইঙৈসিদা য়েংথোকহৌগে খন্দুনা চৎখিবনি। ফজৈ, নুঙাই, য়েংনিঙাইগী য়েংনিঙাই ঙক্তনি। করম্বা থমলগা করম্বাগি ওয়ারি নো তৌদোরিবা, অদুনদি নোংমা ফজনা খোংগ্রাই চল্লগা ফমদুনা লিবা তারি। ঙহাক্কী হোবে হোবেগী ``ব্লোগ '' সিদা লিদুনা লোইগদবা নত্তে।

তঙাইফদনা ময়াম অমুক্তং ঙাইবিখো।

( ওয়ারি সে অসিদা লোইবা নত্তে, নম্ফুদা লোইশন্বা হাইবদুনি । নিউইয়র্ককি মফম মফম দা চৎলুবাগী, নিউইয়র্কার মৈতৈশিংগী মং কয়াসু ঐঙোন্দা লিবিরকখি, ইম্ফালদগি লাকপা ময়াম্ন ওয়াহং কয়াসু থনম্মি, অদুগা ইউ এস তা লৈবা মনিপুরগী স্কোলার কয়াগসু ফোন দা ওয়ারি কয়া শান্নজখি। অদুনা করম্না ওয়ারি ময়ামসে মিয়াম্দা তাহনগদবা, ঐদি খংদ্রে। লাইরিক অমা ওইনা পুথোকশিরা হাইনসু খনখিদবা নত্তে। অদুবু পাবিনবা লৈত্রবা মৈতৈ লোনগি লাইরিক কনাদমুক ফোংবিয়ু হাইজরুগনি। খংদ্রেদা করিনো ঐ না তৌদোরিবসে........................................................ )

থম্বানতোম্বী, ঐগীদি ইন্দোমচানি

     মামা-গী য়ুম চৎলিবনি, ইমাবোক খোয়দা চৎলিবনি হায়দুনা অঙাং ওইরিঙৈদগী ইমাগী মতুং ইন্দুনা ভানুবিলগী থেকোই- মাকোই লম্বেনদু হপ্তা কাংদনা চৎলি। তৌবতবু নিংথম থা-খোংগং থাদদি লবুক ময়াই দা চরুখোক মরকতা তুবৎ শমদৎতুনা য়াংনা য়ৌনবা চৎলি। নত্তেদা, য়াংনা য়ৌবতা নত্তনা ঐনা খুল্লক লৈরক্কী থেকোই-মাকোইগি লম্বেনদুদা চৎতপগী মরম অমসু লৈ-এ। মরমদো করিসু নত্তেদা, মখোইগী খুল্লক-লৈরক্কী হৌনবী মীওয়া ঙাংনবদো ঐনা তানিংখিদবা। অদুগীসু মথক্তা অমগী অমগী ওয়াথী-ওয়ারেম ঙাংনরসু ফবা, ঐগা ইমাগা হেক উবগা, মৌ-নহা খংদে, লৈশাবী খংদে, হনুবী খংদে, হেক্তমক হৌদোরকপা, "ও নখোইগী থম্বানতোম্বীদো অদুদা অসি তৌরম্মী, আ: দুদা অসি হাইরম্মী- ঙাঙম্মী; অদুবু হাইব্রা হৌনব্রানে, অদুম হাইনবু তৌবা হৌনব্রানে লৈশাবী নবু, নুপি মচানবু! "


ইমাদো নোকমি নোকমি তৌরম্বদগি মমাইদো খজিক খজিক ঙাংশনলি, নুংশ্বাশ্বর তপ্না তপ্না হোনলম্বদগী তপি তপি কনখৎলকই, ঐসু ইমাগী ফিদুপ ফিজিদো তপ্না তপ্না পাইরম্বদগী কন্না কন্না চিংই, ঐনা ইদোম খনখি নিংথম থা কুইরকত্রে, খোংগং থা সি লাকখিদ্রেদা, নোংজু থাসিদা লোইখ্রদি ফনি দা।

ইন্দোমচাগি ওয়ারী ময়াম্না হংলক্কনি খনবদা ইমাবোক্কি য়ুম চৎপাগাক খা-ব য়াৎনি। নত্তেনে, মীনা নুঙাইনি নুঙাইরোই খংদে মখোইনা থোঙান্দবু ওইরো, পুখ্রিমপানদবু ওইরো লেপহল্লগা নুপীশিংগী হৌনবী ফাক-ফাক নোকতুনা হেক্তমক হৌদোরকপা, থম্বানতোম্বিদো ঙরাংদি নিপা মচাশিংদুগা গুল্লিবাস পাইদুনা অদুদা চৎলম্মী, আ: নুমিদাং ওয়াইরম ফাউবা পাখং মচাশিংদুগা মার্বেল শান্নরম্মী, অদুদগী নুমিৎ চপ য়ুংবা মতমদা তুরেল মপান দা কাতুক-কারন চৎলম্মী পাঙল নহা খরগা, মথং মথং অসুম শমথরকপা অসুম অসুম। ঐগী নাকোংদো, য়েৎ থংবা নাকোংদো -- আ: কাউথোকতুনা অশাবা পোৎ চৈ পাইরুরগা ইংনবা পাইবা তয়িং-তয়িংলবা নাকোংদো, খরা খরা শাগৎলকই, ফোং ফোং শারকই। খরা ইকাইগনব্-মীঙোন্দা ওয়া হংগৎনা ঙাংবা ঙমদবা ঐসে ইদোমতা লৈখোম তোৎলবা পিকলবা খোংবী অদু মুন্না য়েংলম্মী। হৈমা! খোংবী অসে খরা খরা পিকসনবগুম তৌখি ঐঙোন্দা। ইদোমতা মুরুম মুরুম শোনজৈ, নখোইবুনে খিত্তা তোকলোনে, খোংগং থা য়ৌরক্কদোরে, চরুখোক মরক্তা তুবৎ শমদুনা চৎপা য়ারনি, মথংগী থা' দগী।

মামগী য়ুমগাক চৎচরোই হাইদুনা, ইমাবোক খোইদা অমুক হন্না খোংদাররোই হাইনা ওয়াশকতে হাইবতনি, য়ারিঙৈগীদি চৎলরোইগে হাইদুনা থম্মোইদা খনখ্রবনি। ঙমখিদে, চৎতবা ঙমখিদে। পাবুংনা ইমাগী সনাগী কন্থাপরেং, নাচোম, খুদোপ লোইনা য়োন্থোকখ্রবা মতুংদা সংসারগী অচিন-অকোন মেন্নবা লুপা-পৈসা ইমাবোক খোইদগী লৌরুনবা ইমাদা ঙহাক লৈতনা তকখি, ইমাদুসু কৈদৌনি ঐবু অঙাংনি, ঐনা হাইরদি অবোকতো খরা শাউবা ফনি, ঙাংবসু খরা ফনি খন্দুনা চৎলমদাই খুদিংগী হেক্তা হৌবা। ঐনা ফনমক চৎচরোই হাইবনি, তুংদা পাবুংনা ইন্থোরকপা অদুগা মাংদা ইমানা চীংবগা, কৈদৌনি ইমাগী তুংদা তপি তপি ইন্নখি। ইন্দোমচাখোইগী লৈকাইদো য়ৌবগা নাকোং মেনশনলি, ঐনা ইমাদা ফাগী তৌই সমুদ্রগী খোল্লাউ তারিবনি। ইমা, নংসু নাকোং মেনশন্লু । ঐনা ইমাগী মখুৎ অনিদো মনাকোং দুদা কোমব্রেং শাদুনা, নত্তে নত্তে মোইবুং শাদুনা খুমজন হল্লি। হংঙি, কক্সবাজার গী সমুদ্র মপানদা লেপলগা তাবা মখোনদুগা মানব্রা? ইমাদো ওয়া অমত্তা খুমলকখিদে। শাউরিব্রা করি নো। অদুগা ঙাহাক লৈরগা হৌদোরকই, নখোইগী নন্দোমচা না তৌরিসে খরদি হাকমন্বা য়াৎনি। ঐসু খুমখি, হোয়নে ইমা! পাবুং না তৌরিসে খরদি হাকমন্বা য়াৎনি। খংদে তারিবা তাদ্রা, করিমতা খুম্মকতে।

মামখোয়গী থোঙানদো য়ৌবগা, ইন্দোমচাদো চেন্থোরকই। ঐগী খুৎতা পাইরিবা পোৎয়োমদো কোনলগা ওয়ারি ময়াম হৌদোরকই। নাকন্দা ইমান মদোমতা ঙাইরবী ইন্দোমচাগী ইফা ফারবা কোকতুদা কোকসি খৎলগা লম্বেলদা ময়াম্না ঙাংনহৌরিদো হৌদোক্তুনা ঙাংথবা হৌই। থম্বানতোম্বী, নংনা তৌরিসে হাকমনলিনে................। উচিন-নাচিন ইন্দোমচাদো মাংগোন কাখৎলম্লগা ঐবু চীংদুনা য়েন্নখাদা পুশনলি। অদুগা হৈনৌ খোক্না খোক্না ওয়ারী তৌরকই, অনৌ অনৌবা থৌদোক-ওয়াথোক কয়াগী। মমানবশিংদগী মার্বেল করম্না লোকলকই, কনাগী হৈনৌ পাম্বীগী হৈনৌ মুনলে, করম্বা লৈকাইগী করম্বা ইমুংগী হুইনাউ মচা কয়া চাউরে অসিনা চিংবা। অদুগা মরক মরক্তা ইবানি ইম্ফালদগী ফোংলকপা ''ঋতু''দগী, সিলেততগী ফোংবা ''দ্বীপান্বিতা''দগী শৈরেং, ওয়ারী মচা পামিন্নৈ। খংবা খংদবা ইবানি তা শৈরেং শিংদো পারগা, ঐখোয়সু শৈরেং ইসি হাইদুনা খাতা কলম পাইরগা হেক্তা ইখৎপ হৌই। লম্বেলদা, লৈরক-লৈকাইদা হাইনহৌবা ময়ামদো তমগে তৌবগাক নংহৌদে। ইন্দোমচাগী ওয়ারী ময়ামদো তারিঙৈদা । নোংফাদোকসু ইন্দোনচৌবিনা পারম্বা, থনম্বা শরৎচন্দ্রগী, বঙ্কিমগী, লাইরিকশিংদো পারগা তাহনখি ঐবুসু। তৌবগীদি লাইরিক্কা য়াম্না হৈহৌবা নত্তে । খুঙ্গংগী পাঠশালা লোইশল্লগসু হাইস্কুল কাহনখিদে ইমাবোকনা। হাইখি, কৈদৌদোরিবনো নুপিনা লাইরিক হৈদুনা, মচেসু লৌ ময়াম্না য়োনথোকলগা লাইরিক তমহনখি, অদুগা লৌ ময়াম্মা য়োনথোকলগা থাজবা তাখি, কৈদৌদোইনো।

হনুবীদো লাইমদি মওং চাদে।

বাংলাদেশতা মৈতৈলোন অমসুং মৈতৈ ময়েক তম্বা হৌগৎপগী মতাংদা¨

বাংলাদেশতা মৈতৈলোনগী ফিভম গী মতাংদা Ami Kim অমসুং Kim Seung - না সার্ভে রিপোর্ট ওইনা ২০০৮ কী ফেব্রুয়ারীদা ফোংবা Meitei (Manipuri) speakers in Bangladesh: A sociolinguistic Survey ( SIL international - 2008) ' দা ফোংদোকলিবা রিকোমেন্ডেশন শিংদো ঐখোয়না তঙাইফদনা খন্থফম থোকই ।( রিপোর্ট অদু অসিগী লিংক অসিদা ফংবিগনি-- http://www.sil.org/silesr/2008/silesr2008-002.pdf )

মখোয়না রিকোমাইন্ড তৌরিদো করিনো অমুক্তং য়েংবিনশি, পাবিনশি ``....Based on these factors, which have shown themselves to be prominent in this survey, we would recommend that literacy classes be started to help Meitei children learn to read and write in their mother tongue. These should be taught using Bangla script, since that is what the children will be learning simultaneously in government schools, and since that is what is used widely in Manipur state. If this is successful, the children could later learn the traditional Meitei script as well. Such classes could first start in a pilot location and, again, if successful, could later expand to include more areas in which Bangladeshi Meitei live. These classes could also be adapted to serve as adult literacy classes if and after the children's classes are received well." এক্সপার্ট অনিনা পিরকপা রিকোমেন্ডেশন অসি ঐখোয়না তুংদা মৈতৈলোন অমসুং ঈয়েক তম্বগী থৌদাং লৌখৎপদা খন্থফম থোকই।


মথংদা, মখোয় অনিনা থিজিনবদা ফংবা ফেক্টর শিংদো মখাদ শমলপ্না পনজগে (পুম্নমক নত্তে, মরু ওইবা খরখক্তনি )

** বাংলাদেশকী মনিপুরী শিংসে লোন অনিমক ( বাংলা অমসুং মৈতৈলোন ) ফজনা খংঙি।
** মৈতৈলোন ইবা পাব পুম্নমক ঙমদ্রবসু বাংলাদেশকি মফম খুদিংমক্কি মনিপুরী শিংনা মমালোনবু নুংশিজৈ।
** মৈতৈলোন ঙাংবশিংনা ( মৈতৈ অমসুং পাঙল ) মমালোনগী তমক চাওথোকচৈ, গর্ব তৌজনিংই।
** ইম্ফালদ ঙাংনরিবা মৈতৈলোন তারগা বাংলাদেশকী মনিপুরী শিংনা ফজনা খংবা ঙম্মী।
** বাংলাদেশকী অয়াম্ব মৈতৈলোন ঙাংবশিংনা ইম্ফালগী মৈতৈ লোনবু হেন্না চুম্মী, ফজৈ, তাবদা নুঙাই খনলি।
**খুদোংচাব ফংলবদি, মমা-মপা ওইবা শিংনা মচাবু মৈতৈলোন ইবা-পাব ( মৈতৈ ময়েক ) তমহন্নিংই। মমালোন তমবগী ইমপোর্টেন্ট খংঙি।
** য়ুমদা অমসুং কম্যুনিটিগী মনুংদা মৈতৈলোন হৌজিকসু ফজনা শিজন্নরি।
**মশা মশাগী ধর্ম গী ওইবা থৌরম পাংথোকপদা অমসুং লাই খুরম্বদা মৈতৈ লোন শিজন্নৈ।
** অদুবু লাইরিক হৈবা অনৌবা জেনারেশনদদি বাংলাদনা হেন্না হৈনবগুম তৌরে। অদুনা লাইরিক হৈবগী মশিং হেনগৎলকপগা মৈতৈ লোনবু নুত্তিগী পুন্সিদা শিজনবা ওয়াৎলকপা ওইরক্কনি।
** অহন শিংসু মফম মতম চারবদি মৈতৈ ময়েক অমসুং মীতৈলোন তম্বদা য়াওনিংই।
** মনিপুরী খুন্নাইগী থৌপুবা / লীডার শিংগী মনুংদা মৈতৈলোন তম্বগী হোৎনবদা মোটিভেশন ওয়াৎলি। মৈতৈ লোন তম্বগী কান্নবা খংলবসু মদুগী ইনোৎ মৈতৈ লীডার শিংদগী ফংদে।

হায়রিবা ফেক্টরশিংসিদা য়াম্ন কিনিঙাই ওইরিবদি, লাইরিক হৈবগী মশিং হেনগৎপগা মৈতৈলোন ঙাংবগী মশিং হন্থবগা নক্নবা মরি অমা লৈরিবসিনি। অদুগী মথক্তা ঐখোয় খুন্নায়গী থৌপুবা শিংগী মনুংদা মৈতৈলোন তম্বদা `লেক অফ মোটিভেশন' অসিশু ইকাইনিঙাইনি। অদুনা মফম অমদা পল্লমই, ‘‘ ....when these leaders have been asked how they would be willing to help, a lack of motivation seemed apparent.....We mention this, however, as a word of caution to literacy workers and /or linguists who may consider starting a language development program among the Meitei; attitudes towards their own language are positive, and a desire to become literate is high, but support from community leaders may be lacking at first. We therefore recommend that literacy workers and/or linguists who seek to help the Meitei in Bangladesh should first try to ensure the support of influential people within the Meitei community. ''
অদুনা অমুক্কমুক লোন হিঙহনবগী মতাংদসু তৌফম থোকপা থৌদাং লৌখৎপিনবা ঐখোয় খুন্নায়গী থৌপুবা ওইরিবা, মনিপুরী কম্যুনিটিগী মপা-মপু ওইরিবাশিংদা নোল্লুকনা নিংশিংজবা নত্তনা অতৈ করিসু হাইনিঙাই লৈতে।

মখাদ লিংগুইষ্টিক মাইনোরিটি শিংনা লোন অমবু হিংহনবদা, মাঙশিল্লক্কদবদগী হিংহনবগী মতেং পাংনবা ওইনা ইউনেস্কোগী মাইকৈদগী ফোংবা চেফোং কয়াদ থেংনবা তৌফম থোকপা খরা মখাদ পিজরি: -

* লেংগুয়েজ ডকুমেন্টেশন হাইবদি প্রিন্ট মিডিয়া, ইলেক্ট্রনিক্স মিডিয়া অমদি ডিজিটাল মিডিয়াদ লোনদুগী ফংবা মচাক পুম্নমক রেকর্ড তৌশনবা।
* অনৌ অনৌবা মেটেরিয়ালস পুথোকপা, অনৌ-অনৌবা পাম্বৈ শিজন্নবা। খুদম ওইনা ইমেইল, ব্লগ, রেডিও দা ইমালোন শিজন্নবা।
* লোকেল লিংগুইষ্ট ট্রেনিং পিবা।
* লোনগী ওজা ট্রেনিং পিবা।
*মাংখিদৌবা লোনবু হিঙহন্নবগী অনৌবা পলিশি লৌখৎপ, হৌদোকপা।
* মীয়ামদা লোনগী লৈরিবা সিচুয়েশন ভাব তাহনবা অমদি খংহনবা (এওয়ারনেস পিবা ) ।
* লোন অদো হিংনবা হোৎনবদা ময়াম্বু সাপোর্ট পিবিবা, ইন্ডিভিজুয়েল লেংগুয়েজ ষ্পিশিয়েলিস্ট তগী হৌদুনা লোকেল এন জি ও , লোকেল গভর্মেন্টতগী হৌদুনা ইন্টারন্যাশনেল ওইরবা সংস্থান খুদম ওইনা ইউনেস্কোগুম্ব সংস্থান নসু মতেং পাংফম থোকই।

অরোইবদা, হিরমসিদা এক্সপার্ট ওইরবা পন্ডিত শিংনা অসম্ন হাইখি, ‘ লোন হিংহনবদা - শিজন্নবদা থৌদাং লৌদোরিবদি লোন অদো ঙাংলিবা কম্যুনিটিগী মেম্বরশিংনানি, মপানগী মী নত্রগা মীতোপনা নত্তে; অসি মখোইগী ( কম্যুনিটিদুগী ) অপাম্বনি- করম্ব মওংদা, করম হাইনা, করম তৌনা লোন অদুবু হিংহনবা ।’ ( In the end, it is the community people, not outsiders, who maintain or abandon their language: it is their choice if and how to revitalize, maintain, and fortify their language.) UNESCO Program ''Safeguarding of Endangered Languages'' (Intangible Cultural Heritage Section, UNESCO ) Arienne Dwyer, Matthias Brenzinger, and Akira Y. Yamamoto.

মতাংশিদা অমর্ত্য সেন না ইশাগী ঈনাৎ -চৎনবী- লোনগী মতাংদা করি খনখিবগে হাইবদুসু পনবদা মতাং চাই খনজৈ, ‘‘ --- মানুষকে তার ঐতিহ্যের কোন বিষয়গুলি বজায় রাখবে বা বর্জন করবে তা মুল্যায়ন করার সম্পুর্ণ স্বাধীনতা দিতে হবে। ..
প্রকৃত পক্ষে স্বাধীনতা সম্বলিত এই দৃষ্টিকোণ থেকে সার্বজনীন অভিমুখি কোন অংশ প্রবর্তিত থাকবে সেই বিচারের পুর্ণ অধিকারে কারও বাধা দিতে আসা সঙ্গত হবে না—না জাতীয় স্তরের বা স্থানীয় `` রক্ষক’’ স্থানীয় ব্যাক্তিরা , না আয়াতোল্লা বা অন্যান্য ধর্মীয় কতৃপক্ষ না রাজনৈতিক বা কোনও স্বৈরাচারী শাসনকর্তা অথবা দেশের বা বিদেশের সংস্কৃতিবিষয়ক কোনও ‘ বিশেষজ্ঞ’’। ঐতিহ্যের সংরক্ষণ বণাম আধুনিকতার সুযোগ সুবিধার মধ্যে যে সংঘর্ষ হয় তার সমাধানের নির্দেশক হবে সকলের সংযোগে আবির্ভুত সিদ্ধান্তে অতীত গুণমুগ্ধ নৃতত্ত্ববিদদের কোনও রাজনৈতিক শাসক বা ধর্মীয় শক্তির দ্বারা আধুনিকতার সুযোগসুবিধার প্রত্যাখ্যান করে চিরাচরিত প্রথাগুলির প্রচলনের স্বপক্ষে সিদ্ধান্তে। এই বিষয়টি সম্বন্ধে সিদ্ধান্তের ব্যাপক আলোচনা হওয়া প্রয়োজন সমাজের সকল স্তরের। ধর্মীয় মৌলবাদ বা রাজনৈতিক প্রথা বা তথাকথিত এশীয় মুল্যবোধের নামে সমর্থীত চিরাচরিত মুল্যবোধের নামে সবার অংশগ্রহণের স্বাধীনতাকে রোধ করার প্রচেষ্টা ন্যায্যতা প্রশ্নটি উল্লঙ্ঘন করে। যারা এই বিষয়ের দ্বারা প্রভাবিত হবে তারা কি চায় এবং তারা যা পরিবর্তন সাধন করতে ইচছুক তারই সিদ্ধান্ত নেবার প্রক্রিয়ায় যোগদান করার সামর্থ্য অত্যাবশ্যক। ( উন্নয়ন ও স্বক্ষমতা, ২০০৪, পৃ: ৪১-৪২, অমত্য সেন )

অসিদা হাইরিবা - ফোংদোকলিবা ওয়াখল্লোন অসিবু মীতৈ খুন্নাইগী সংস্থান পুবিরিবা পুম্নককনা খন্থফম থোকই। খুন্নাই অসিগী করম্বা হৌনবী-চৎনবী (ট্রেডিশন, ভেল্যুজ, ইথিক্স ) থাদোক্কনি, করম্ববু শৌগৎকনি হাইবদো নৈনবগী খুদোংচাবা খুন্নাইশিগী মীয়ামদা পিফম থোকই। অদুগা লোইননা ইমালোন-ঈনাৎপু নুংশি, চাওথোকচৈ হাইরগতা ঐখোয়গী দায়িত্ব লোইদে, ঈনাৎ অমসুং ইমালোনবু য়োকখৎপা অমা চংঙি।

বাংলাদেশতা লৈরিবা মনিপুরী সংস্থান কয়াগী ওর্গানাইজার অমদি লীডার শিংনা মদুগী লৌফম থোকপা থৌদাং অদো হৌজিকমক লৌহৌদ্রবদি তুংদা বাংলাদেশতা ঐখোয়গী কম্যুনিটি/ ফুরুপ্না ইশাগী ঈনাৎ ঙাক্তুনা - ইমালোন ঙাংদুনা হিংবাগী লানফমদা অতৈসু শোত্থহৌগনি। মদুগীতমক মতমসিগী সংস্থান কয়াসিগী ওর্গানাইজার অমদি লীডার শিংদা তুংগী জেনারেশন্না তাইনরক্কনি, তাইনফমসু থোকই। মতাংশিদা নোংচুপ লমগী মমিং চৎলবা পন্ডিত অমগী ওয়াহৈ খরা নিংশিংবা য়াই, ‘‘ ..Critical self-consciousness means, historically and politically, the creation of an elite of intellectuals. A human mass does not '' distinguish'' itself, does not become independent in its own right without, in the widest sense, organizing itself; and there is no organization without intellectuals, that is, without organizers and leaders, in other words, without the theoretical aspect of the theory-practice nexus being distinguished concretely by the existence of a group of people '' specialised'' in conceptual and philosophical elaborations on ideas...." ( Culture and ideological hegemony – Antonio Gramsci )


অদুনা ইশাগী আইডেন্টিটি ঙাক্ন ফুরুপ অমা ওইনা , বাংলাদেশতা মীতৈ লোন ঙাংবা কম্যুনিটি অমা ওইনা, মনিপুরী নাৎ, চৎন- লোনচৎ ঙাক্ন লৈবা কম্যুনিটি অমা ওইনা হিংবা তারবদি ইমালোন অমসুং ঈনাৎ হিংহনবগী থৌরম থৌদাং হৌজিকমক পাইখৎপা তাই।

ঐ গি ফোংখ্রবা শৈরেং অনিখক

পার্বতী নত্তে রোবোটি, নংবুনি ঐনা খোইদাজখিবদো


ঙাংজুনরবা শমলাং , পুমথা থাদোকলগা কোনশনলকই তুংলোমদাগী
নুংশীখ্রেদা, মী ত মী ওইরবোই খন্দুনা থম্মোয়দা খোইদাখিবা খংহৌদে।

মেংলবা খোঞ্জেলদা কৌরক্লি, কুইনা উনদ্রবা কনাগুম্বিনা কৌরকপগুম
নোংলৈ নুংশীৎ মরক্তা খাংপোক শঙ তেকথখিবগুম তেকথখি থম্মোয়সু।

নুংশীমিৎয়েংগী লাংশোইদুনা খৌরি তান্ন লংশল্লকই, মিকুপমতং
অনিশুবা লানজাওদা তমথিরবা গ্যাসকি মনমনা পংথখিবগুম, পংথখিবা
খংহৌদে।

থওয়াই পানদ্রবা রোবোটি, কয়াদি ফজখ্রেদো নংগী লশিং হকচাং
শায়োংশদা ফিরেপ
নোংমগী কায়দনা এক্সারসাইজ, হেলদি এন্ড ষ্ট্রোং, টেনশন লৈত্রবা লাইফ
ষ্টাইল।

পাম্মু নুংশী খংদ্রবা নংগী থম্মোয়-থোংনাউ, চোকথবা লৈত্রবা পাঙন্দেম পাম্বোম
ইঙা-ইঙেনগী নোংজু-নুংশাদা চোকথদ্রবা হকচাং, কল্লক মীহৌ য়াওদ্রবা মীৎস্না।

য়ুম্বাল্লোন ডিপ্লোমেসিগী ফিদুপ্না খ্বাংদা খ্বাংজেৎ লাকতুনা,
কেরিয়ার এন্ড হোম
ফুঙ্গাদা শঙ্গোম, শঙ্গোনদা পাংয়োং ব্যাল্যান্স মথৌ তাদ্রবা
নিংথিরবা নিংজোন।


মখুৎ তরা লোংবা পার্বতী, নোংমাতসু তম্পাক্তা কোনশিনবিখিদে ঐবু
থওয়াই-থম্মোয় য়াওদ্রবা রোবোটি, নংবুতনি ঐনা খোইদাজখিবা নুংশি-
লৈক্রকসিদা।



())))()))))))))))))))()))))))))))))))))))))))))))())))))))))))))))))))))))))))



      নোংমাইথেম লৈকাইগী লৈহাও শাৎলরোইদো হয়েংদগী
                                                                                               হামোম প্রমোদ

( কিয়োটোদা অঙৌবাশিংনা য়াইফরে য়াইফরে লাউজরবসু, আর্কটিককি পোলার বিয়ারশিংনা খুবাক খুজরবসু, কোপেনহেগেনগী মাইচৌশিংনা নোকফেৎ তৌদুনা মিৎচিনা য়েংলকলবসু, আফ্রিকাগী লৈক্রক মরক্তা- কেনিয়াগী মাসাই মৌ নহাশিংদুনা খোইরুম নোংলক্তে কৈদৌনুংদসু।
' ঐ’সু তেংথাবদা  য়াওজনিংবতনি। )

খামেনশিনবীনা পোকখাইরক্লবদা, বাধাকপিনা শাকাইরকলবসু, মোঞ্জাউবিনদি কৈদৌনুংদসু শাউগৎখিদে। `ঐ ’ তনা নুঙাইজখিদবনি, খুইজিনলবা পাম্বিশিংদো উবদা।

হিদেমপানগী ওয়ারকতগী উচিন নাচিন লিৎথোকতুনা, ঙামোইনুদুনা থরো থরো ওনথখিবদো মনিং লৈকাইগি পুখ্রিচৌদুদা, ঙা লুমলিবা উরোকতুনা উহৌদ্রবসু, ` ঐ ’ নদি করম্না কাউথোকলুনি, পাবুংনা কোর্ফুদা য়োক্লিবা ঙামু শিংদো।

লৈহাওগী লৈনমদা ঙাওজখিবা চেক্লাদুনা চীংয়া তময়া কোইথুং থুংনা পাইরুরবসু , নোংমাতসু তোংলদে নোংমাইথেম লৈকাইগী লৈহাও পাম্বিদুদা। লৈহাও লৈনম চেনদ্রবা লৈহাও পাম্বিনি, চীংথামগি লৈশাবীশিংনা ফাগী তৌবিখি। কোন্থৌজমগী অহলদুনদি হাইখি, লৈহাউ ওয়াৎপনা ওইরমগনিদা। থোঙামগি মচিন য়াওবা অঙাং অমনা শৎ হেক হাইদোকখি, লৈহাও পাম্বিগাক অমত্তা থমলরোই, ককথৎখ্রনি হয়েংমক, হৈনৌ-থৈবোংগী চারা অমা অনি থাজনগে।

আহ! লৈহাও ! লৈহাও ও !
লৈহাউ ওয়াৎপনসু ওইরম্বা য়াই, চহী খুদিংগি - কুম খুদিংগী লৈহাও চরোং চরোং শাৎলম্বদো, শাৎখিদরে অমা অনিফাউবা কুমসিদি। `ঐ’ না শাউনিংখীবদি চেক্লাদুদানি, ও চেক্লা, ওই! নোংমতসু তোংলরাও কৈদৌগে লৈহাওগি লৈকাশিদা, নংগি খোঞ্জেল তাবদা, নংগি মহুম ফংবদা শোইদনা শাৎলক্কনি, হয়েংদগি- লৈহাওগি লৈকাদা লৈহাওলৈ।

চেক্লাদো, মমাং লৈকাইগী চেক্লাদো, মমিৎ উইরুম উইরুম অমুক্তি য়েংলম্মী, অদুবু নোংপোক পাংনা চপ য়ুংনা পাইখৎখিবদি তোকখিদে।

       কনা উদ্রিঙৈদা, নোংমাইথেম লৈকাইগী লৈহাওলৈমনা হিক্না হিক্না কপখিবদো, লৈহাও পাম্বিদো কোল্লদুনা, `ঐ’সু  য়েংশিন্নদনা চৎখিবতনি, থম্মোয়দা নুংশ্বাশ্বরদি হোনখিদবা নত্তে এ।

ফেব্রুয়ারী ২০১০ দা ইখিবনি

লম-লোন-ইমালোন-ইমালৈবাক

নোংমা নোংমগী হিংনবা হোৎনবদা, হৌজিক করি চাগনি - হোরেন নুমিদাং করি থোংগনি খনবদা চরম কংলবা য়ুমগী অহলশিংনা ঙাহাক্তং ফমথরগা য়ুকোক্তেনদা ঙাথরগা চিনি অঙাংবগি চা অমসুং হিদাকপুকতা হিদাক থকতুনা তুংগী ওয়াখন চনিং তানা খন্থৈ। অদুগা মতু-মচা-মমৌ-মশু শিংদা পাওমেনলি, য়ম্বানলোনগী পোথী-পোরম তাকপদো- নিংশিংলকই ঙসিদি। য়ুম্বু লৈত্রবা য়ুমশিগি, য়ুম্বুরেল পানদ্রবা য়ুম্নাকশিদা, শাগৈগী অহলনা অসুম শোন্থরকলবদা। কনানবু তাকপিরগবা ঙসিদি, খুন্নাইগী চিরবা মতমসিদা, তুংগী ওইবা পোথি-পোরম, ইশাগি শক্তম ঙাক্না, চাব-থকপা অওয়াৎপা লৈতবা নুঙাই-য়াইফবা খুন্নাই অমা ওইনা হিংদুনা লৈগনি হাইবা। অমরোমদনা খুক্কনপাঙ্গনলবা কাঙবুনা লুমদুনা লৈরি, খজিক্তং অহোবা ফংবগা, শাংলবা খুৎ অদো থিংজল্লক্তগী। অশোনবা তাঙফম ঙাইদুনা লৈরি, লাউরবা মখয়াৎ অদো কাথোক্তুনা, য়োৎশন­গে হাইদুনা। মৌসুমী মতমগী নোংলৈ নুংশিৎনা কন্না কন্না হুমলকপদা লাইরবা য়ুমগী খাংপোকশংগুম কিন্থরকতগি ঙাইদুনা লৈরবা য়ুমজাওদো উবদা পাখৎচৈ, নুংশা থিজৈ।

নোংলৈ নুংশিৎতা, নোংখাকপদা ব্রজ তাই খংনা খংনা হৈনৌ খুনবা চৎলি, হাওরবা হৈনৌ দো মীতোপনা খুনখিনি খন্দুনা। নোংজু নুংশারক্তা লবুক্তা, পাৎতা ঈন থাদুনা, লোং খোন্দুনা, ইমা-ইন্দোন, ইচে-ইচন শিংনা ঙাখা-পুথি-ঙাকিচৌ-ঙামোইনু ফাব চৎলি অওয়া অনা থিদনা য়েঞ্জাং খরা হাওনবগীতমক। লৌপুশিংনা অহিং তুমদনা লমজাইদা য়ারেকই, পামফৌ ফৌরিবা লৌবুকশিংদো ঙাকশেন্দুনা। তমথিরবা শা-ঙা খুঙ্গংদা চঙকতনবা মখুৎ চাবা খুৎশু-খুৎলাই পাইদুনা ঙাকশেল্লি পাখংশিংনা, নহারোল শিংনা।

অনৌ-অনৌবা পোত্থোক্কা লোইননা অনৌ-অনৌবা মহিক কয়াসু চঙক্লে ঐখোয়গী খুন্নাইদা। লম্বেল-থোং ফরকপগী মতিক অনৌবা মখোন কয়াসু তাব ফংলে। ইলেক্টিশিটিগী মরিতা নত্তনা অনৌবা মরি কয়াসু থুংলরে য়েন্নখাদা-শন্দোংদা। গ্যাসকী পাইপকা লোইননা, মহু কল্লবা লিন কয়াসু চঙক্লে ঐখোয়গী চাখুমদা। টিভি গী অনৌ-অনৌবা চ্যানেল য়েংলিঙৈদা মীহুৎথোং লোনবা কাউথোক্নরে। অনৌ-অনৌবা মোবাইলগী ষ্টাইল হোংলিঙৈদা য়ুমগি য়ুম্বি শিন্বা ঙমদরে।

আশাদি, ঙসিগি মৈহৈরোয়শিংনা ঐখোয় খুন্নাইগী লায়েংবা হৌরকলিবসিনি, খরা থেংথরবসু টর্চলাইট থান্দুনা মীৎস্নাগী পিশুম হাইগৎতুনা য়েংলিবাসিনি। কনা কনাগুম্বনা পাখৎচৈ, নহানা মাইবা শারগা মং য়ৌবা য়াংই, হাইদুনা। ঐদি থাজখিদে। অনৌবা মুর্তী অমা শাগৎপদা হকচাংগী কয়াৎ খরদা নুংধং-পাইজৎনা খরা শোকচরবসু, ইশাগী মুর্তী ইশানা শেমদোকচবনি, কাইদে।

ঐনা পাখৎচখিবদি ( ঐসে খরদি পাখৎকন্‌বা য়াৎনি, ৭১'গী লান মরক্তা পোকলপনা ওইরম্বসু য়াই, মেডিকেল সাইন্সনসু চুম্মী হাইনৈ ) লাইরবা ঐখোয়গী ফূঙ্গা লাইরুদা ফংখিবা মতিক-মগুন লৈরবা `লন' দুনি। করম্না ঙাকশেনগনি খংনদ্রিঙৈদা, ঐখোয় ইমুংমশেলতা মুন্নরিঙৈদা, মীখুৎতা তাখিগদ্রা। মার্কেট-ইকোনোমিগী খাবৈ না শক চু ফজরবা হেরিটেজ সে কোৎথোকপিখিগদ্রা, অসিদনি ঐ-না মং হা নুঙাইত্রিবসু।

বাংলাদেশতা ঙসি হোংলকলিবা ফীভম অমসুং ভারতকী অওয়াং-নোংপোক না অনৌবা ভীশন, অনৌবা মীহুৎথোং কয়া হাংদোরকলিবসে মুন্না নৈনফম থোকই, উচুক পাইদুনা অসুম য়েংদুনা লৈফম থোকতে। বাংলাগী চিদাই খরদা কোইচাই চাইদুনা তারিবা মৈতৈ মচাশিংনা ভারত অমসুং বাংলাদেশ লৈবাক অনিগী খোংথাংদা - মিহুন্দা অহোংবা কয়া লাকলিবসে খন্থফম থোকই।

পত্থরবা 'চেফোঙ' - ঙাতোপকী মনম নমলুসি ঙাহাক

মণিপুরদা নোংচুপকী মঙাল লাকখিবসি সমুদ্র ওয়াংমাগী লন্ডন -প‌্যারিস-নিউইয়র্ক তগী লাকখিদে। চীং কয়া জঙ্গল কয়া হুৎতুনা মঙাল অদো ইম্ফালদা থুংখিবদি সিলেট-ঢাকা-কলকাতা গী ` ময়াং ' শিংদগিনি। বৃটিশনা মণিপুরবু কোলোনি ওইদুনা লৌশল্লবসু মীয়ামগী থম্মোয়দি ' লোয় ' চন্বা ঙমখিদে। মখোয়দা ' বাবু ' শিংদগী মঙাল অসি য়ৌরিকখিবনি। মসিগী প্রমাণ ওইনা মতমদুগী চেফোং শিংদুগী মমিং মথা অমদি খোন্থোক-খোল্লাউদা উবা-তাবা ফংলি ।
চেফোঙ খরগী মীং অমসুং মতম : নিতিগী ফোঙবা - দৈনিক মণিপুর পত্রিকা - ১৯৩২, ভাগ্যবতী পত্রিকা-১৯৪৬ , প্রজাতন্ত্র - ১৯৪৬, প্রজা - ১৯৪৭, ঐখোয়গী মণিপুর - ১৯৪৭, ঙসি - ১৯৪৮, লৌমী - ১৯৪৯, জন্মভূমি পত্রিকা - ১৯৫০, মাদর মণিপুর - ১৯৫৩।চয়োলদা ফোংবা: - তরুন মণিপুর - ১৯৩৮, মণিপুর মতম - ১৯৩৯, অনৌবা যুগ- ১৯৪৭, প্রজা - ১৯৪৭, লৌমী - ১৯৪৮, ভাগ্যবতী - ১৯৪৭, প্রজাশক্তি - ১৯৪৯, ভারত সেবক -১৯৬৩ ।
থাখায়দা ফোঙবা; - ঙসি - ১৯৪৬, খোঞ্জেল - ১৯৪৭ (ত্রিপুরা ), মৈত্রবাক - ১৯৬৬, লাসানী - ১৯৬৭ ( সম্পাদক - শ্রীহট্টদগী লাকপা শোনি ), ভারত ইমা - ১৯৭৫,থাদা ফোঙবা: - মাসিক জাগরণ - ১৯২৪ (সম্পাদক - শ্রীঅর্জ্জুন সিংহ বি, এল, সহকারী সম্পাদক - শ্রী পারিজাত সিংহ অমসুং শ্রীরামকৃষ্ণ সিংহ ওইদুনা সিলেটতাগী ফোংবা ) , য়াকাইরোল - ১৯৩০, ললিত মঞ্জরী পত্রিকা - ১৯৩৪, মৈতৈ মাইবা - ১৯৩৮, মণিপুরী মহিলা - ১৯৩৯, মৈতৈ - ১৯৪১, ছাত্র জগৎ - ১৯৪৬, পলেম - ১৯৪৭, ইমারোল - ১৯৪৭, জ্যোতি ( মাতৃভাষা উদ্বোধিনী মাসিক পত্রিকা ) - ১৯৪৮, কিষাণ মেগাজিন - ১৯৫০, সাহিত্যগী ঈচেল - ১৯৫০।
থা অহুমদা ফোঙবা :- মণিপুরী সাহিত্য পরিষদ পত্রিকা - ১৯৩৭, মীংনাইদবী -১৯৪৭, মুক্তি - ১৯৪৯, পঞ্জেন - (কাছাড় ) ১৯৫২, লৌমিগী পাউজেল -১৯৬৩, সাহিত্য -১৯৬৩ ।
---------------- (লৌখৎচবা: মৈতৈ-চেফোং , রাজকুমার শ্রীস্নাহল সিংহ বি-কম, ইম্ফাল ।

বাগানগী 'কুলিবাবু ' ' টিলাবাবু' না হাফপ‌্যান্ট শেৎলগা লমবি-লমখাংগা তুরিৎ তুরাৎ চৎলবসু নমথিকো হাইদুনা মনাক চংশিনলুদে। অদুবু টাই কোর্ট পুন্বা ` বাবু ' দি ঐখোয়না কৈদৌনুংদসু মিরাইখিদে। মিরাইফমসু থোকখিদে। মতমদুগী চৎনবীগী (ট্রেন্ড ) ওয়া নত্তে, মালেমগী মফম খুদিংমক্তা থোকখিবা থৌদোকনি। ঐখোয়দসু থোকখি, খরা থেংলবসু থেংনা থুংলখি। মদুগী তমক ' এ বি সি ডি বাবু ' দা তাইনফম থোকতে। মখোয়দি মতমদুগী ' পোৎথোক ' নি। মখোয়না ঙানলম্বদুসু থাজ ' গী মঙালগুম্বনি, নুমীৎকী- থওয়ানমিচাক্কী মঙাল ওইনা ঙানলম্বা কয়া য়াওখিদে। অদুদা পেঞ্জদবগী ওয়াতনি।
থাজ'গী মঙালদা ফৌ ফৌখিদে কৈদৌনুংদসু, শিং কংহনখিদে নোংমতসু। থাবল না ঐখোয়গী থম্মোয়বু শুমহৎলবসু, ইংলবা হকচাংবু শাগৎনবাদি নুঙাল্লকপগী নুমিৎকী মঙাল ঙাইদুনা লৈনখি। মেংলবা থাজগী থাবলদা কঙাওদুনা চৎলুরবসু থওয়ানমিচাক খরনা লম্বি তাকলকখি, পন্থুংফম য়ৌবগী লিচিংবিখি। নোংমতসু লম্বী হুকতুনা চৎখিদে মখোয়গী থোঙানদুদা, মতম খরা চংলবসু অনৌবা লম্বী গী কুরুক-কুরাক মরকতুদা চৎপদি তোকখিদে নোংমতসু।
নোংচুপকী মঙাল ফংবা 'বাবু' শিংদুগী হোৎনমনদগী মণিপুরী খুন্নাইদা অহোংবা কয়া লাকখিদবা নত্তে। মদো পুম্নমকতুসু ঐখোয়না কাওথোকফম থোকতে। অদুবু অসিমসু কাউফদে নোংচুপকী হওয়া-নুংশিৎকা কা লোইননা মহিক খরসু পাইশিল্লকখি। মশানা তাবনি। অদুনা ' ময়াং বাবু ' শিংদা থুংবা লাইনা লাইথুং পুম্নমক ঐখোয়দসু চঙকখি, চুরুঙনখি। খুদম ওইনা মতমদুদা ফোংখিবা চেফোঙ খরগী লামায় খরা হাইগৎতুনা য়েংসি কৈদৌগে .............................
সন্ধ্যাগী ভাগ্যবতী পত্রিকা, আগষ্ট -১৯৪৮: " মণিপুর সভা সমিতিনা শন্থীয়েন চোংবগুম পংচোংদা চোংথোরকলে। প্রজা সংঘ, কৃষক সভা, মণিপুর মহাসভা, মৈতৈ মরুপ, চন্দন সভা, সেবক সভা, অমসুং পালা সভা মকোই অসিনি। সভাশিং অসিগী মরু ওইবা থবক্তি শোই খোম্বনি। ... .... .... হন্দক্কী সভা সমিতি অসুক য়ামনা চোংথোরকলিবা অসিগী উদ্দেশ্যদি ভোট পীদুনা মেম্বর হাপকদৌরে অদুনা মাগী মাগী কাংবগদগী মেম্বর থাগত্তবা য়াদে অসিনি। অতোপ্পা অমনা মরৈবাক নুংশিবা নাস্তিক কংগ্রেসনা ধর্ম্ম মাংহগদৌরে অমসুং নিংথৌনা মনিং মখা তমনা পায়রম্বা রাজশক্তি অদু কংগ্রেসনা লৌখিদুনা প্রজাদা পীথোকখিগদৌরে, অদুনা প্রজানা চাউখিবা তারে, চাউহনবা য়াদে, নিংথৌদা পাওয়ার পীশিনসি, নিংথৌ চাউনসি, প্রজাবু নৈখিসি, অদুনা কংগ্রেস শোলহনসি, কংগ্রেস থুগাইসি অসিনি। ( কংগ্রেসকী অমতা ওইবা মতমদুগী চেফোঙ নি । )
মাসিক জাগরণ, মার্চ - এপ্রিল, ১৯২৪ : '' ( বাংলা অমসুং মৈতৈলোনগী থাগী চেফোঙদা মণিপুর অমসুং মণিপুর মপান্দা ফোঙবা চেফোঙশিংগী মনুংদা মসিনা মহাল্লে - অইবা ).............................. বক্তা জাগরণের উৎপত্তির সমালোচনা করেন। মৈতৈ ভাষায় প্রবন্ধ লেখকের সংখ্যা অত্যন্ত কম এবং বিষ্ণুপ্রিয়াদের মধ্যে মৈতৈলোন বুঝিতে পারে এমন লোকও আবার কম - বিশেষত: জাগরণের অধিকাংশ গ্রাহকই বিষ্ণুপ্রিয়া বলিয়া আপাততঃ মৈতৈ ও বাঙ্গলী ভাষায় পত্রিকা চলিতে থাকিবে এবং মৈতৈ প্রবন্ধের বৃদ্ধির সহিত ও শিক্ষিত বিষ্ণুপ্রিয়াদের জাতীয় ভাষার জ্ঞান বৃদ্ধির সহিত উক্ত ভাষা বাঙ্গালার স্থান অধিকার করিবে। বর্ত্তমানে দলাদলি প্রভূতি নানা কারণে আমাদের সমাজ ছিন্ন বিচ্ছিন্ন ও বিক্ষিপ্ত বিশেষতঃ পরাধীনতার দরুণ " ভাই ভাই ঠাঁই ঠাঁই '' হইতে আরম্ভ করিয়াছি। এমতাবস্থায় জাতীয় আন্দোলনের প্রারম্ভেই এই বিষয় নিয়া মৈতৈ ভাষাভাষী ও ................................................ জাগরণের ভাষা যখন ভবিষ্যতে সম্পূর্ণ মৈতৈ হইবে, তখন উক্ত ভাষায় লিখিত মৈতৈ লৈমার আবশ্যকতা যে কি - বুঝিতে পারিতেছি না। আমাদের প্রতি কাছাড়ারের মৈতৈ ভাষাভাষী ভাইরা কি কতটুকু বিশ্বাস করিতে পারিতেছেন না? ( চেফোঙ অসি বাঙ্গালা অমসুং মৈতৈরোন নত্তনা অতোপ্পা লোনগী ওয়ারেং শৈরেং ফোঙবা য়ারমদে.... ) ''
তরুণ মণিপুর, সেপ্তেম্বর - ১৯৩৮: মণিপুরদা নুপী অককপ লৈতনা নুপা অমন থিব য়াই। অদুগ খাইননিংব মতমদা খাইনবসু য়াই। অদুদ নিপা অদুন ঐ মাবু লৌররোই- মান থোকপা তৌজখিব য়ারে হায়রবদি নুপী অদু ময়ুম অমা পানজখিব য়াই, নত্তদুনা মওয়া অদুন থাবিদ্রিঙৈদা ময়ুম পাল্লুরবদি লুপা ৫০ - ময়েক ওইনা পিদবা য়াব নত্তে। ফন ঙকপ য়াব চৎনবী অমনি। কনাগুম্বনা নুপী অম থিব মতমদা লুপা কয়া পিদুনা থিবগে নত্রগা লৈবগে? মমিং মকসু ' মমল হনবা' কৌনৈ - করম্বা মমলনো? নিপান নুপীবু করম্ব দলিল ইনদুন রেজিষ্টার তৌদুন লৈবগে? ......................................... অমসুং করম তৌরগা খাইনবা য়াব-নচিংব আইন শেম্বীদুন নুপান তৌবদি য়াব নুপীন তৌবদি য়াদব থিংবিব মতম ওইরে। নুপাসু নুপীগ ওয়া লোইনদ্রিঙৈদ মতু অম থিরবদি মতিক চাব শেল নুপীন ফংজব য়ানব আইন অম শেম্বীরবদি নুপী ঙাকপিব অম ওইন থোক্কনি। শেংখ্রব লুহোংববু মোৎখ্রব নুপীগী ললোনফম ওইব থিংবিব মতম ওইরে । ''
মণিপুর মতম, জানুয়ারী, ১৯৪০ : " ইংরাজী ১৯৩৯ সাল লোইখরে, অমুক উবা ফংলরোই।তৌইগুম্বসুং চহি লোইখি হায়দুনা অতিয়াদা ঈশিং, নুংশিৎ অমসুং কংফান্দা অনৌবা অধ্যায় অমা হৌবদি খক য়াদে। ............................. চহিসিগী লোইরকপা মতাংদা ইউরোপ্তা অকনবা লাল অমা হৌই। হৌজিক মদুগী ইচেন্দো অহোইনদুম কনশিল্লকই। ........................................................ নোংপোক্তা চীন অমসুং জাপান কন্না লাল সোকনরি। চীন্না জপানগী আক্রমন নোংম নোংমগী জয় তৌরক্লি হাইরি। মণিপুরদা নিপা য়াওদনা নুপিনা আন্দোলন তৌরি। "
অনৌবা যুগ এপ্রিল ১৯৪৭ :" .... হৌজিক মনিপুরদা বৈষ্ণব ধর্ম্ম চৎপদা নত্তনা মিতৈ মরুপ ( স্নামহি ), মিতৈ লাইনিং মরুপ ( পাখংবা ) অসিনচিংবা কয়া লৈরে। অসিনা কাংবু কাংবু মরৈ য়েৎনবা, খবরদা চৈনবা, ফি শেম্নবা ফাওবা য়াওরে। মাংলে হায়বগী দমক্তা কোর্টকী সাহয্য লৌনবগী থৌরাংদা কেশ তৌনবসু য়াওরে। অদুনা লৈবাক কুম্মৈ তারে। .... ........... .......... বামোন বামোন থেংনবগুম মৈতৈগা মৈতৈগসু থেংনরে অদুনা ধর্ম্মনা ওয়াহৌ ওইদুনা হিন্দু মণিপুরি সমাজ মশেন থেংনবা অশান্তি অমা ওইরে। .......... ................. ....... ধর্ম্ম খুদিং অচুম্বা লম্বীদা চাওখৎনবা হোৎনবিয়ু। অনৌবা যুগকি মঙান্না লৈপাক পুম্নমক ঙাল্লবা মতমসিদা ঐখোয় খৎনদুনা ভাবোক্কী কুম্মৈ তাহন্দুনা লৈখিগদ্রা? শুবনা মপুং চাবা শেৎপনা মনাতপ ওইবা মরাইবক থিরবা মী লক্ষা অওয়াবা কয়া খাংদুনা লৈরি। লৌউবা কয়া মীওইনা পানবা ঙমদ্রি। ঙসি ফাওবা লৈপাক্কী অওয়াবা অমত্তা কোক্‌ত্রি, লৈপাক্কী দাবী দায়িত্বশীল শাসন ফংদ্রি। দাবী ফংনবা হোৎনবদা পুকচেল তিন্নবিয়ু, দাবী অসি ধর্ম্ম জাৎ খাইদনা অপুনবা মণিপুরী জাতিগী দাবীনি। "
মরূপ, (ত্রিপুরা )মার্চ ১৯৭১ :" .... ত্রিপুরাদা জাতি অতৈগী মরক্তা রাজ্য অসিমা পুমশিন শিন্না মরক মরক্তা হৎল হৎলদুনা খুন্দারিবা ঐখোই য়ামনদি ওয়ানরে। অদুবু করি করম তৌরগা হিংবা য়াগদগে হায়বগী ওয়াখল অসি পুবিরবসু ঐখোয় ইশেনতা য়েংথিনদুনতা লৈথোকলগা অমনা অমবু থৌশানদ্রগা লোইরে হায়দুনা লৈরে। অসিগুম্বা ওয়াখল অসি থাদোকতুনা অমত্তা ওইবগী পুকচেলদা হিংননবগী লম্বী শিন্দ্রবদি ঐখোই রাজ্যসিদা পুম্মাং মাংবা হায়বদু শোয়দনা ওইরগনি। ... .............. ................. ইজাতিবু কন্ননবগী ওয়াখল লাকতবনা অতৈ জাতিগী মরক্তা লৈবা খুদোং চারক্তবনা ত্রিপুরা থাদোকতুনা মপান্দা চেনখিবনা ঐখোয়গী অবস্থা অতৈসু হেন্না শোকখিবনি। মরম অসিগী ত্রিপুরাদা ঐখোয় অমত্তা ওইনা অতৈ জাতিগী মান্ননা হিংনবগী লম্বী শেমলসি। নত্রবদি ঐখোই ত্রিপুরা থাদোকতুনা চেনবা হা্য়বদু শোয়দ্রবনি। "
-------------------------------------------------------- --- ---------- ----------

হৌজিক্তি রিসাইকলগী যুগনি- গ্রীণ গ্রীন এভরিহোয়ার। অমুক্তং শিজনবগী মহুৎতা য়ারিবা মখৈ হঞ্জন হঞ্জন্না শিজনবা পামনরকলে। মাংদা তাবা অতোয় -আকায় শিংসু অমদা অমদা থোক থোক লংথোকতনা মফম চানা খুঞ্জন্দুনা থম্নরে। মমাংঙৈদা করিসু কান্নদে খন্দুনা খোংবান-লুপান্দা লংশেকলম্বদো ফজনা মফম চানা থম্দুনা ' কম্পোজ ' তৌদুনা লৈহাউ ওইনবা শিজনবা হৌরকলে। ঐখোয়গী মীৎয়েংসু খরা তুং কোইনা, ইশাগী - ময়ামগী কান্নবা মশক খংনা য়েংবা মথৌ তারক্লবনি। ঙাহাক্কী নুঙাইনবা, পেন্থোকপতনা পুন্সী গী পন্থুংফম ওইবা য়াদে
বাংলাদেশতসু ১৯৭৫ - ২০০০ গী মনুংদা সিলেট -ভানুগাছ - বিশগাঁও - শ্রীমঙ্গল দাগী চেফোং কয়া ফোংখি। মতমদুগী চেফোঙ খরদুগী লামাই খরা হাইগৎতুনা য়েংলুরগদি মখোয়না হোৎনরম্বদো থাগৎনিঙাইনি। তৌবতবু নিঙাই কন্বা, হোৎন কন্বা হাইবদুদি সম্পাদক ওইবিরিবা অমা -অনি নত্তনা কয়া য়াওখিদ্রে। মসি মখোয়তগী মরাল নত্তে, পাঠক - রিডার -অডিয়েন্সকীসু মরাল লৈতে হাইবা য়ারোই। চেফোঙ শিংদুগী মমল নোংমা নোংমাগী হেনগৎলকখিনি, মরমদি মরক মরক্তা তুং হন্না য়েংবা, নাক-য়েৎ -ওই য়েংবা অমসুং হৌজিক্কী ওইরকলিবা ফিভমসিগী মরম থিগৎপদা চংদবা য়াদ্রবা ' পোৎশক' অমা ওইরিবনি।

অন্দ্রোগী মৈ

অন্দ্রোগী মৈ
-------------------- হামোম প্রমোদ

মখোয়নদি থাজনৈ, কৈদৌনুংদসু মুৎলকত্রবা মৈরি হয়েংসু শোয়দনা ঙানখিগনি
ঙরাংতা শগোল কাংজৈ শান্নরম্বা কাংজৈবুং ঙসিনা চাওরবা মার্কেট ওন্থোকখ্রবদা
খম্বা-থোইবী গী মপাননাইদ্রবা লোক্তাক পাৎ মখোয়গী শেন্দান লম্বী,ওইনরকলবদা
মোইরাংগী য়ুমথোং খুদিংগী য়োংখমদা ফিদুপকী মহুৎতা অঙৌবা ফি মতেক ঙাক্তা
ঐদি থাজদ্রে বো, অন্দ্রোগী মৈরাদো হয়েংসু চাকখিগনি হাইবা। সুক থা থাজদ্রে।


কনানবু    পুবিরকখিগনি, নুমিৎকী শীংপোৎ অমমম, মশাগীতা খন্নরবা মতমসিদা
কনানবু   মতম কায়থোকপিগনি, অহিং-নুংথিল -নুমিদাং, ফুঙ্গাগী মৈরি মুৎতনবা
কনানবু    শেংদোকপিগনি, ঙাহাক লৈতনা, নোংমগী তৎতনা উৎ ওয়াই অমো অকায়
কনানবু    য়েংশিনবিরক্কনি, কান্নবগী মৈঙাল য়াওদ্রবা, হৌনবগী তৌজবনি খঞ্জরিবা, মখোয়না ।


লাকও, য়েংলুসি ময়াম অন্দ্রো
গী ফুঙ্গা , ঐখোয়গী হৌরকফম
ফুঙ্গা ওয়ারী’ গী লীখুন থীবা ওইনা।


হাইদ্রো দামগী মৈরি না মুৎখ্রবসু
কলহৌসি অন্দ্রোগি মৈরি
মৈরা পাইবিগী মৈরা’না ঙাল্লিঙৈসিদা।

অনৌবা শৈরেং চরোং অমা

কোকিল অমসুং লমখুনু


লমহুকনরবা লমখুনু পাইশল্লকই য়েন্নখাদা
নুমিৎনা সনথোংদা ঙাইদুনা লৈরিঙৈদা
শাইজিনগী শেন্দ্রাংনা চাকতাবা চৎখ্রিঙৈদা
শুমাং দা চোংঙাশিংনা মতু ফোইনরিঙৈদা


হিংগোনগী খামেন পাম্বিদা খোইনিং খরনা মচিন্গা মচিন্গা
ওয়াংলবা ক্বা পাম্বিদা উরিৎ শিংনা মহুম শারী পুক্নিং চংনা
চরোই অমা, খংহৌদনা কদোমদগীনো , য়াকলবা খোঞ্জেলদা
পুমনিল নিল্লি খা-অওয়াং - নোংপোক-নোংচুপ মাইকৈ মরিমক্তা


লমলানবীনি হাইনরিবা কোকিল, খোঞ্জেল নুংশিবী ও! কোকিল
করিগীনো তুমিন্না লৈথোক্‌খিবা, তঙক তঙক য়েংদুনা
থৌনা লিংজেন লৈত্রবসু নংগী মেংলবা খোঞ্জেলদুনা, অমুক্তং

মনিংগী থৈবোং পাম্বিদুদগী খোংলকউ কৈদৌগে, কুহু-য়ু হাইদুনা

আহ ! কোকিল, "খৌজেং নান্‌বা অমুবা লিনগী শক্তম লৌবা" চেক্লা ও

ওহ! লমখুনু!
ল
ম
খু
নু

অন্থোকপনিদা!
চোইজাইননা তারিবা শরু শরাং
শুমাংথুংনা মোন মোন লাউরবা চদুম চদুম
পোলাংখোক মখোংগী চিদাইমদা, পিরাং কংদ্রিবা
তনিক তনিকলবা মীৎস্না অমা, নাইতোম তাদুনা লৈহৌই ।


নোংমা, থেংলবা অহিংদা চিক্লবা তম্পাক অমাবু খৌরাংদুনা
চেক্লা অদো য়ুম থাদোরকখিবনি, থাজগী মঙালমরক্তা
চেক্লামতদা হাইরমদনা মদোমতা কনা খংহনদনা ।।
=============================================

নরসিং টিলাগী থম্বালিকা; নিংশিংলিবরা ঐবু
--------------------------------
মতমদো, মোইরাং কাবী ফিদুপনা উরনা ওনথোকত্রিঙৈ, মচু নাইবা ফনেক্‌না থ্রি
পিছ ওনথোকত্রিঙৈগী যুগনি। বোরাক তর্ব্বানদা য়াহৌঙনবী লৈশাবীশিংনা
ইরুজরিঙৈদা অমুবা ক্বাকনা ঙৌরবা সাপোন চেনখিবা খংহৌদনা পাখংশিংনা
নুংশা য়াইনরিবা মতমনি।
.................. ঙসিসু নিংশিংলি ঐদি ঙরাংতা থোকখিবগুম!

চহিগী ইশিং ইচাউবদা শহরগী অপুম-অশা পুম্নমক তাউথখ্রবসু হাইঙমদবা
ওয়াহৈ খরদি লৈহৌই বোরাক তুরেলগী ইরৈনুংদা তাউদুনা, কনামতনা
নিংশিংদ্রবসু ক্বারপারগী থোংখোংদা পনদুনা লৈহৌই থম্মোয় খরদি। থ্রাক থ্রাক
য়ানদুনা লৈহৌই থাদোকপা ঙমদ্রবা থওয়াই খরা শাহজলাল মাজারগী গম্বুজতা।
`বোরাক ` না ` সুরমা ` কৌজখ্রবসু থম্মোয়শিনদি য়ানিংখিদে কৈদৌনুংদসু ' নং ' মী গী ওইখরে হাইবা।

. ............... হাইয়ুবা কৈদৌগে অমুকতংসু ' ঐ' দি নংতগনি '' ।

চিনবানদা কয়ারক হাইগে খনখি, হাইঙমদনা নংগী য়োংখম মনাক্তা লেপ্তুনা লৈখি,
নংগী পাঙনদেম তারকপা ঙাইদুনা। ফিকোনচৈনা অসুম অসুম চাওথোরকলবসু
পাখং থৌনা অসুম অসুম শোনথরকখি। হংগৎনা য়েংবা ঙমখিদে নংগা
মীৎচানখিনি খনলুবদা। লংচাক্‌কী শাংলবা লংলাদি লোইখিদো , তারকখিদে
পাঙনদেম - অমুকতংসু।

.............. মায়থিরবা মাইথোং পুঙমদনা লাকই , কোনুংগী লমজাওদুদা।

থম্বালিকা! নরসিং টিলাগী থম্বালিকা !
নংবু, নোংমগি তত্তনা ঙাইখিবনি, জিন্দাবাজারগি লমদোং অহুম ফাংবদুদা।
মাইকৈ মাইকৈদগী আজানগী নিনলবা মখোন্না তাখিদে নংদি, ঐ ' গী শোন্থাংলবা
খোঞ্জেল, ইদোমতা লৈহৌই তঙক তঙক নমথিরবা ডাষ্টবিনগি নাকনদুদা।
থৌদাম লৈকাইগী কাংশী মখোন্না তান্‌থা য়ৈরকপদা হনজিনলকখি, ঐগী পিকলবা
কা'দুদা। সন্ধ্যা আরতীগি মন্দিরা মখোন্না পুমনিন নিনখি শুকলবা কা ।

তৌফম খংদ্রবা ঐ মান্ডবতা চৎলি হরি নাম শোন্দুনা।

করম্না কাউথোক্কনি, হাইয়ুবা নখোয়বু ! করম্না কাওথোকসিগে ! লাপতক্‌না লৈবা
ঐ 'বু য়েংশননদনা, অমুবা কোর্টকী নাকন্দা ফমলগা রিক্সোগী হুট হাইথাখিবদো।
খংহৌদনা, হাকালুকি হাওর গি ইশিং পুম্বা শহর গী লৈরক্তা চেন্থরক্‌খি,
বন্দর বাজার গী ঈন পুম্নমক তাওথখি বোরাক্কী কল্লবা ঈরৈনুংদা। জাফলংগী নুংজেং
পুম্নমক লংশল্লকখি শিবগঞ্জগি চীংদোংদুদা। মঙাকনখি অহিং কয়া, তুম্বা য়াদ্রবা
নুমিদাং কয়া কোইচৎ চৎখি শাপম লৈকাইগী পুখ্রী মপানদা।

নুঙাল্লমদাইগী আজানগী মখোন তাবদা মংফাউনহল্লি ঐবু।

থম্বালিকা, নরসিংটিলাগী থম্বালিকা! কদাইদনো নংবু হৌজিক?

=============================================


ইতা সখি !


নাটোর 'গী বনলতা সেন
মণিপুরী শাড়ীগী ফিজি খরা থাঙ্গৎলগা
নোকফেৎ তৌদুনা কৌরকই, ইতা সখি !

নিংথৌখোংগী চন্দ্রসখি
করিমতা নাচুংদনা তুমিন্না লেপ্‌লি
ঙৌশোক ঙৌরবা কোখুম্বি অমগি মরুমদা ।


=============================================

নোংমৈ মরু


নোংমৈ মরুদি নোংমৈ মরুনি
.............................................. লাইবক্তা তম্না কাপশল্লকলবসু
নোংমৈ মরুদি নোংমৈ মরুনি
....................................................... খংহৌদদুনা কাপশিল্লকলবসু
নোংমৈ মরুদি নোংমৈ মরুনি
............................................ শোয়দোকখিদুনা কাপশিল্লকলবসু
নোংমৈ মরুদি নোংমৈ মরুনি.
............................................... উশিত্তনা কাপশিল্লকপা ওইরসু
নোংমৈ মরুদি নোংমৈ মরুনি
................................................ থৌশাদনা কাপশিল্লকপা ওইরসু
নোংমৈ মরুদি নোংমৈ মরুনি.
................................................ নুংশিদদুনা কাপশিল্লকপা ওইরসু
নোংমৈ মরুদি নোংমৈ মরুনি
.................................................. নুংশিদুনা কাপশিল্লকপা ওইরসু
নোংমৈ মরুদি নোংমৈ মরুনি.
....................................................... খুরমদুনা কাপি্পরম্‌লবসু
নোংমৈ মরুদি নোংমৈ মরুনি.
.............................................. `ফ্রেন্ডলি ফায়ার`বু হাইজরবসু


কিশি কিশনলবা নোংমৈগী চীদোনদা শাৎলি অমুবা গোলাপ অমা।