মন্ত্রিয়েলগী ফ্রান্কোফোলি ফেষ্টিভেলদা আলফা ব্লোন্ডি -01

কানাডাগী মন্ত্রিয়েল সিনেমা-থিয়েটার - জগোয়-ঈশৈ হাইবদি আর্ট-কালচারদা য়াম্না ঙাওজবা শহরনি। সামার হেক য়ৌরকপগা ফেষ্টিভেল কয়া পাংথোকলি- জগোয়গী, ঈশৈগী, থিয়েটারগী, সিনেমাগী মখন মথেনগী। পৃথিবীগি মফম কয়াদগী আর্টিষ্ট কয়া লাকতুনা শরুক য়াবতা নত্তনা ভাবোকশিংগা ফম্বিনদুনা ওয়ারী শান্নৈ, সেল্ফি থাংগৎলি, ওটোগ্রাফ পি অমসুং মফম মফমদা ওয়ার্কশপ -টকশো তৌদুনা ময়ামগা নকশন্ননবা হোৎনৈ। হন্দক খরনি মমাংদা পাংথোকখিবা (০৯ জুন - ১৮ জুন) ফ্রাঙ্কোফোলি  ফেষ্টিভেলসু অদুগুমলবা ফেষ্টিভেল অমনি। ক্যুবেক্কী শকনাইরবা কলাকার অমসুং মালেমগি মমিং লৈরবা ফ্রেঞ্চ লোনগী কলাকার কয়ামসু ফেষ্টিভেল অদুদা শরুক য়াখি। আলফা ব্লোন্ডি সু ফেষ্টিভেল অসিদা শরুক য়ারখি। আফ্রিকা-ইউরোপ - নোর্থ আমেরিকাগী শিংথাবা য়াবা মিউজিশিয়ানশিংগী মরক্ত মহাকসু অমনি। ঐগী য়াম্না পামজবা সংগীতকার অমনি। মহাক্কী মমালোন নুঙশিবা, পোলিটিক্যালী মোটিভেটেট মিউজিক ঐঙোন্দা হ্ঞ্জন হঞ্জন্না তানিংবগি নুঙাইবা অমা ফাওহল্লি। মরক মরক্ত মৈতৈলোনগী কলাকার তাপ্তাবু  নিংশিংহল্লি। মন্ট্রিয়েলগী ফেষ্টিভেল অদুদা তিনখিবা ময়াম মহাক্কি ঈশৈদা তাওথহনখি পুংজা কয়া। 

Alpha Blondy eigi camera da thengnakhiba mikupa ama 

  কানাডা ইংলিশ লোনগী লৈবাক অমা ওইজরবসু ক্যুইবেক প্রভিন্স - ফ্রেঞ্চনা অফিসিয়েল লেঙ্গুয়েজনি, তৌবতবু মন্ত্রিয়েলদি ইমিগ্রেন্ট য়াম্না লৈবনা ইংলিসসু অসুম চৎনৈ, তশেংনা বাইলিঙ্গুয়েলনি মন্ত্রিয়েলদি। ইংলিশনা পান্‌বা লৈবাকতা ফ্রেঞ্চ প্রভিন্স অমগি শহর অমনি মন্ত্রিয়েল। অদুনা লোনগী মতাংদা অসুম টেনশন খর লৈ, আর্ট- কালচারদসু অদুগী মমী তাই। নোর্থ আমেরিকাগী অতৈ শহরদা লৈবগা খর খেন্নৈ, তোঙান্বা মহাও অমা লৈ।  ইং-তপ্না নুঙাইনা পুন্সী লেন্‌বা য়াই। মন্ত্রিয়েল আমেরিকা মহাদেশতা ওইজরবসু ইউরোপকি মহাও অসুম ফংলি অমরোমদা সাউথ এশিয়ানসু ( বাঙালী য়াওনা ) মশিং য়াম্না লৈবনা কালচারেলি পোত্থাবা ফংঙি অমসুং ঐখোয়গা শক মান্নবা এশিয়ান ওরিজিনসু য়ুমথংননা লৈবিনবনা চিঞ্জাক্তা, য়ুম-লৈ কৈরৈদা নুঙাইবা অমসু ফাওই। অদুনা য়ুমলৈবাক-ইরৈপাক - পোক্নফম লমদমদগী তাম্না লৈরবসু মফম অসিদা অসুম হৈনরক্‌খি। মফম অসিগী হরাও নুঙাইবদা শরুক য়াব হৌরকখি। হকচাংতা নত্তনা থম্মোয়সু তং তাখি মফমসিদা।

মন্ত্রিয়েলদা মিউজিক ফেষ্টিভেল ময়াম অমা পাংথোকই, লৈকাই লৈকাই দা পাংথোকপগুম মশিং লৈতনা  হপ্তা কাংদনা পাংথোকই। তৌবতবু য়াম্না পাক্‌শন্না নেশনেল-ইন্টারনেশনেল থাক্‌তা পাংথোকপা য়াওবদি মরি -মঙাতনি। অদুগী মনুংদা ফ্রাঙ্কোফোলি ফেষ্টিভেলসু অমনি। চহিগী পাংথোপগুম কুমসিসু ফ্রাঙ্কোফলি ফেষ্টিভেল জুনগি তাং ০৯ দগী প্লেজ দ্য আর্টস কৌবা মফমদুদা  হৌখি অমসুং তাং ১৮দা লোয়শনখি। নুমিৎ তরানি চুপ্না পাংথোকখিবা ফেষ্টিভেল অসিদা মন্ত্রিয়েল অমদি কানাডাগী শকনাইরব শৈশকপা শৈশকপি তা নত্তনা ইউ এস এ, ফ্রান্স, বেলজিয়াম অমদি আফ্রিকাগী ফ্রেঞ্চ লোলগী মমিং চৎলবা মিউশিয়ান কয়াসু শরুক য়ারখি। ওপেন এয়ারদা স্টেজ শাদুনা টিকেট য়াওদবিদা ভাবোক লিশিং লিশিংনা য়েংবা য়াব মওংদা পাঙথোকপগা লোয়ননা অডিটরিয়াম মনুংদা টিকেট কক্তুনা য়েংবা য়াবা শো কয়ামসু পাংথোকলি। ওপেন এয়ারদা স্টেজ মঙা লৈ। স্টেজশিংদো য়াম্না লাপ্না লৈনবা নত্তে, খোংনা মিনিট মঙা তরাদা য়ৌবা য়াই, মফম অমদা ঈশৈ তারম্বদগি অমদুদা য়েংবা চৎপা খুদকতা ঙম্মি। স্টেজ শিংদো চাওবা মান্নদে, ইনভায়রনমেন্টসু মানহন্দে, খরা অফাওবা মমিং লৈবা শিংনা শক্কদবা পার্ফোম তৌগদবা স্টেজ শিংদুনা খরা চাওনা চংখোন্না তৌই অমরোমদনা খরা অমনা পিক্তক তৌবা মী য়া্‌ম্না য়েংবা ফম্বা চন্‌দে, মদুদনা নহা ওইবা হৌগৎলকপা মিউজিশিয়ানশিংবু পার্ফোম তৌহল্লি। ফ্রেঞ্চ লোনগি অফাওবা মিউজিয়ানশিংগা লোইননা খরা খরা ফাওবা হৌগৎলকপা তুংদা ফাওরকক্দবা কয়াগী খোন্থোক্‌সু তাব ফংহল্লি ময়ামবু।

ফ্রাঙ্কোফোলি ফেষ্টিভেল ঈশৈগি নিল-খোংলিবা অসি উরগা থম্মোয়নুংদা ফাওরকখি,  ইরমদম ওইরিবা বাংলাদেশকি খুঙ্গংদা শরূক য়ারকখিবা রাস পূর্ণিমাগি জগোয়-ঈশৈ। মঙ্গেমখোংগী সানাঠাকুর মান্ডপতা ভানুগাছ খুঞ্জা তরামরি অমদি অথাপ্পা মৈতৈ খুঙ্গং কয়াদগী লাকখিবা কুমহৈ য়েংবা মীয়ামগী নিন্‌ খোংলিবা মখোল। নিংশিংহল্লি ঐবু, অদুঙৈ ইম্ফালগী হাপ্তা-কাংজৈবুংদা ইমান্নবা ময়ামগা হরাও তয়াম্না য়েংমিন্নরকখিবা শঙাই ফেষ্টিভেল। খংনিং য়েংনিং লকই মরূপশিংদো, খংনিং নিংশিংলকই খুঞ্জাশিংগী অহললমন শিংদো। অদুবু, থম্মোয়গি অচিক্‌পা ইংখোলনুংদা নুংশ্বাশ্বর থবেৎ থবেৎ হোন্বা নত্তনা করিসু তৌনিঙাই লৈখিদে। ফেষ্টিভেলদা লাকখিবা ময়ামগি ইরাওখোলনসু ফাজনবা ঙমখিদে নাইতোম তারবা থম্মোয়বু, ইদোমতা পোত্থাফম খংদনা কোইচৎ চৎলি স্টেজ অমদগী স্টেজ অমদা। কাওথোকনবা হোৎনখি কাউঙমদ্রবা মখোয়বু। মীয়াম মরকসিদা '' ঐ '' ইদোমতা লোৎকে হোৎনৈ ঐঙোন্দগী। অদুবু !!