অনৌবা শৈরেং খরা

 

Handakta Ikhibaseireng khara  -

খুদৈ মতেক

য়েংঙু দো -
থ্রাক থ্রাক য়ান্দুনা লৈরিবা খুদৈসে 
ঐ না খুদোম্বী   থিন্দুনা তাক্্ই -- ইচানিপাদা

শালুঙাং মচুগি ময়ুংদা হিজং মচুগী মফেন
হিজং মচুগি ময়ুংদা শালুঙাং মচুগী মফেন

ওইরম্বসু য়াবনি, কাংলুপ অমগী ফিরাল ।
 কনানবু শারকপনো ঐনা হংলুদে কৈদৌনুংদসু
ইমানা পিরকপনিকো হাইদুনা থমজল্লি, থুপচিন্দুনা -
  টাওয়েল 
               টিস্যু
                         ন্যাপকিন 
                                             ড্রায়ার ..

নোংমা নোংমা গী খুদৈ মতেকতো থাপথোক্খি।
থবক অমত্তদা চনদনা তাদুনা লৈ, খুয়া খা দা
নোংমা কনা খংহনদনা ডেকো-পিছ ওনথোকখি
ড্রয়িংরুমগী কোনামদা য়ান্দুনা থম্মী। থ্রাক থ্রাক

ইচানিপা দো - হাইফেৎ মীচি না য়েংলম্লগা 
নোকফেৎ তৌদুনা তপ্না তপ্না ইমুংদা চংশিনখি।

 

ল্যাম্পপোষ্ট

সোডিয়াম লাইটকী ঙান্লবা অহিংদুদানি
নোক্মি নোক্মি মহাক্না হাইরকখিবদো-
নাহে-খোঞ্জেল নত্তে, ইচং থৌরবা কনাগুম্বা অমগুম
শহরগী মীরাওখোল মরক্তুদা খংলাউ লাউরকখিবদো-
মুথৎপিরম্মু ঐগী মঙাল, মমহল্লু শহরগী লম্বীপুম্বা
অদুগা,
ঙালহল্লু গলি গলিগী ইমুং পুম্বা- ড্রয়িংরূম, লিভিংরুম
চিত্থবিরমগনু অমত্তা কিচেনরুম, বেডরুম, বাথরুম সু
হাইদোকপিরম্মু য়ুখল পুম্নমক, উজসনু লম্বীদা চৎলিবা ময়াম্না
ইমুংগী ওয়াথোক পুম্নমক, য়েংহল্লু-তাহল্লু লমজাওগী মীয়াম্দা

মথং মথং মখা তাথরকই -
মমবদা থোক্কদবা অকি তুজুংলবা থৌদোকশিংদো
ইমুং খুদিংগী ঙাহাকলৈতনা থোকলিবনি, নোংমগী কায়দনা
মমলবা শহরগী লম্বী নত্তে, শেন্নবিগদবাদি য়ুম য়ুমগী কা মনুংদানি
মুথৎপিরম্মু ঐগী মঙাল, ঙালহনবিয়ু শহরগী কা পুম্নমক, অমত্তা চিৎথদনা

ষ্ট্রিটলাইট ওইদুনা ঙানলিবা ল্যাম্পপোষ্ট
মদোমতা লাউহৌই, অহিং অদো তুমদনা
ড্রেনেজগী নমথিরবা মনম মরকতুদা
মুশিন মুরবা কয়লাস মথকতা লেপলগা।

 

ইকেবানা অমসুং বনসাই

লৈরাং কয়াগী পীরাংনা শেমখি মখোয়গী ফজরবা ইকেবানা ’গী লৈকোল,  ফজবদা ঙাওজরবা মখোয়গী মখুৎনা নুংশী খংদনা কক্থৎপিখি লৈরাংগী মশা, মনা, মথং মথং -

কক্থৎপিখি, নাকনদা লৈবা পোমশাৎনরবা লৈরাং কয়াসু,  নুংশি হৈতনা I ফজবা নংনা নমহৎখি মহৌশাগি লৈজরম্বা, হিংগোন্দা শাৎচরম্বা লৈরাংশিংগী হৌনবিদো।
ইকেবানা’ লৈরাংশিংগি ্বারী তারগা, মপি কংখ্রবা বনসাই খোংনাং -পাম্বী,
হিক্না হিক্‌না কপলক্‌খি, চহি মরিফু হেল্লবা, খুদুপমুক্তা ্বাংলবা তরু তনান্লবা, 
আহ! ইপু খোংনাং পাম্বী ,
নিংশিংলক্খী, মমান্নবা শিংনা শাংলবা মশা,  শান্দোক্লগা হায়- হুমদুনা পাল্লিবদো, মখল মথেনগী উচেক কয়ান                        পুমনিন-নিন্লিবদো I 
মীঙমলক্তে মদোমতা।

ইকেবানা অমসুং বনসাই পাম্বিদগী চেন্থরক্লিবা পিরাং উবিখিদে কনানসু, 
ফজবদা ঙাওজরবা ময়াম তপ্না তপ্না চৎনখি,

মসাগী পেন্দবাশিংদো নিংশিংদুনা

মদোম তুমিন তুমিন।

মণিপুর, ঐগীসু পেনদবা খরা লৈ

‘‘ মণিপুর
মীনা নঙবু ইমা কৌনৈ
ঐসু কৌজগে ইমা
অদুবু শিবদি ঙম্লোই নঙগীদমক।’’
- থাংজম ইবোপিশক

‘ মখোয়গী মণিপুর’ দা চেনলিবা
নম্বুল তুরেল, মথং মথং লাকতুনা
ঐখোয়গি য়েন্নখাদা লৈবা বোরাক্তা
চুমদ্রিং হেক্তা ফেনজিনখিবনি, য়াব য়াদবা।


কৌব্রু চীংদোনদগী শিন্থরক্পা পিরাং
নুঙাল্লকপদা লিক্লা ওনদুনা লৈরম্মি, ঐখোয়
মমাংগি হিংগোনদা হৌরিবা হঙ্গাম মতোনদুদা
লৈকাইগী অবোক্না খংহৌদনা ফোইদৎখিবনি
সোরারেন্না মতিন শিৎচল্লকপনি হাইদুনা, খংবা খংদবা।

লোক্তাক পাৎতা হি হোন্বা অমনা
নুংশিরবা মতমগি ইশৈগি শৈশক পুম্নমক কাউথোকখিদুনা
ইমোজীৎ নিঙোম্বগী শৈরেং অমা মদোমতা ঙংলি, কনা তাহনদনা --
‘‘ মায়থীখ্রবসু
ঐদি পাম্মী
খোংজোম লান
ঙসিগী অসুম্মাইনা হিংগদবগী শরুক ।।’’

ঈশৈগী সুর ওইনা থোকউ য়াদ্রবা শৈরেংগী ব্াহৈ পুম্নমক
নোংলৈ নুংশিৎ ওনদুনা পাইরকখি সিলেট- নরসিং টিলাগী কাংজৈবুংদা
থুদেকপিরম্মী শান্নরোইশিংগী আশাগি পাম্বী পুম্নমক, মফম মরাং খংদনা।

ইম্ফাল সহরগী লৈরক লৈকায়দা চৎথরিবা কোম্বীং ওপারেশন
অয়ুক নুংথিল নুমিদাং খংদনা ইমু নাইমু তানরবা লমজাও
নোংজু থাগী লেপ্পা নাইদ্রবা নোং, ইশিং ইচাও
লময়াইদা লৈবা কাংপোকপি পাৎতা ইফুৎ ওইনা ফাওগৎলকই
ঙাংশং ঙাংবা তকৎ তকৎলবা ঈ, লেপ্পা নাইদ্রবা, থিংবসু ঙমদ্রবা।

‘ মখোয় ’ ময়াম্না আকাশবাণী ইম্ফালদা শন্দোরক্পা

‘নহারোলগী খোঞ্জেল ’ না পেলহন্বা ঙমলবসু, ঐতদি
পেন্জবা ঙম্খিদে, থম্মোয়নুংদা ওমচাক্‌নবা অমা ফাওখি, তশেংবনি
মণিপুর,
ঐগীসু পেন্দবা খরা লৈ, ইরমদম্মক নত্রবসু।