মালেমগী শৈরেংগী খোঙচৎতা অহোঙবা কয়া লাকপগুম মণিপুরী শৈরেংদসু অহোংবা কয়া লৈরকই। অদুবু চহী য়াঙ্খৈ মমাংগী শৈরেংগা হৌজিক্কী ইনরিবা শৈরেংগী মরক্তা থেংনরিবা অওনবসি হকচিন্ননা য়েংলুদবনা মনুং হন্না খংবা ঙমদ্রবসু অতোপ্পা মহাও অমদি ফাওই। ঐনা লৌখৎচরিবা শৈরেং খরসি পাজরুবদসু অওনবা অসি অসুম উজবা ফংলি। সাহিত্য নৈনবা সমালোচক অমগী মীৎয়েংদা য়েংলুবা নত্তে, চুম্নগী শৈরেং পামজবা অপাব অমা ওইনা পাজরুবদা পুক্নিংদা ফাওরকপা খরদো ইচম চম্না ফোংদোকচবনি।
ইমালোন মণিপুরী ওইজরবসু, বাংলাদেশতা পোক্লুবা অমদি চাওরকপনা মহৈ মশিং তম্বাসু ইমালোন্দা তম্বা ফংজখিদে। বাংলা / বেঙ্গলী লোন্দা অঙাং ওইরিঙৈদগী লাইরিক তম্বা হৌরকখি, ইশাগী ওইবা পামজবা-খন্জবা- নিংজবা পুম্বা বাংলাদ ইবা তম্লকখি। অদুবু ইমালোনগী সাহিত্যদি অসুম লোয়নরকখি, বাংলাগী সাহিত্যকার ময়ামগী পোত্থোককা ফিঙ্গারুক অমদা ইমালোনগী শৈরেং-বারেং-রারীমচা, উপন্যাস খরসু ঐখোয়গী অহল লমনশিংনা থম্বিরম্মী। অদুনা ঐগী থম্মোয়গী লবুক লমহা্ংদা বাংলাগী বঙ্কিম, শরৎচন্দ্র, নজরুল গা লোয়ননা হিজম ইরাবত, ডা: কমল অমদি হিজম অঙাংহলসু লেংকোন্ননা চৎপিন্নখি। থেংলবা অহিং কয়া লোন খংনদ্রবসু ঐনা ঙকচান্ননা য়েংদুনা লৈখিদবা নত্তে মানিক বন্দোপাধ্যায় অমসুং জি. সি. তোংব্রা' না তুমদবা মখৈ মরৈ য়েৎনখিবদো। নোংফাদোকসু ঊন্নহন্নিংখি জীবনানন্দ' গী ``বনলতা সেন'' অমসুং এলাংবম নীলকান্তগী ``চন্দ্রসখি'' গা।
মথং মথং ...
>>>>>>>>>>>>>>>>>>>>>>>>>>>>>>>>>>>>>>>>>>>>>>
Progressive Writers Association, Manipur Chapter
Progressive Writers Association, Manipur Chapter গী ফেসবুক তগী লৌখৎচবনি
https://www.facebook.com/groups/1162944217068921/?multi_permalinks=3524220554274597
উমা ময়েংবম' গী শৈরেং ১০ -
১ পেঙবা
ৱাইথৌ ঙাতোন তুনানবী
নচেম থরাক উবরা
কেকুবুদি লোৎলিবরা
খোমলেন মীকপ তানলিবরা
তানলিবরা ??
ইম্ফাল ইরিল নবুলদা
কুচু হেনবী নিংথিবী
কংলৈ মীরেন শকতাকপী
পেঙবা মাবু থেংনবরা
থেংনবরা ??
খাবক পেঙবা তুনা মনিংতম্না
থৌবালগীদি ইরৈদা
সেকমাইজিংগী তোরৈদা
চেন চোংদুনা চাক্তাখিবদো
উহৌবরা, উহৌবরা ??
লোক্তাক ঈশায় মাপলদা
চাদা নৌদা শেমলম্বা
পনজাওবীদি ইথায়না
থৎখরবো ঙসিদি
থৎখরবোদে ??
২. পোত্থাফম
ওইজগে নতমবাক্তুদা পোত্থাজফম
তমজগে লৈকানুংদুতা পেনজনা
ইরোন ইরান তাক্ল তুংগী
পাওদমশিংসে অৱা নুংঙাই ।
নঙদি পুক্নিংগী ওইনফম্নি
ৱাখলগী চেৎল শৈদাংফম্নি,
ঈংজবী মায়থোং,থোৎলবী লৈনা,
নঙতমক ঙায়রে ঐগীদি ।
তাইবংদা কনা উদ্রসু
মঙলান্দা কনা লাকত্রসু
খনজরি নঙবুুদি অরেপ্পনি
পুন্সিগী অরোনবা পোত্থাফম ।
শিন্থজগে পীরাং নফমদতা
লেনজগে পুন্সি নশাইগোন্দতা
ঙাওজগে নঙগী লৈনমদুতদা
নাইতোম তারবা পুন্সি ওইনা |
৩. নঙবু মীচেনলো
তীংথোক্লিবা খুৎতুদা
পক্লিবরা;
শেংলবা হুমাং মনম নশাগী,
থাংদোক্লিবা খোঙদুবু
ইল্লিবরা খূদুং;
চেৎল মার খোঙ্গুলশিংদুগী?
পুন্সিদুনা চেৎনা পুনখিদুনা
হুমদোকহনখিবদি চুম্বরা
পূম্নমক নহাকথক ?
অপাম্বদুনা পুক্নিংদুদা তোংদুনা
শেংলবা ঈগী ঈচেলবু
নাথৈহনবদি চুম্বরা ?
মীৎকুপশিংদুনা চীক্লরবদা নফমদা
শীংনরকপশিংদুনি চাংয়েং নঙগী ।
মীচেন্দি ওইখিদে
পাগী পরিংদা, পুগী ইচেলদা,
নোনখিদবনি কোক কনাগী মফমদা
ওইখিবতনি পোন্থা কৎথোক্লবা থৱায়না,
অদুনবু শেমখিবনি পুৱারী
মুৎনাইদ্রবা পুৱারী;
মালেমদা অনি শুদ্রবা।
৪. লমজা সরা
মথিবোং পুমথরক্লবা থরোই খরনা
লুপফেৎ লুপফেৎ তৌরক্লিবসে কুইরে
হুপনৌনা কুপলমবদগী কংথরক্লবা পুখ্রিনূংসিদা ।
হায়গৎলম্বা কাংখৎলম্বা মকোকতুসু সুম সুম নোন্থখি সুম সুম লুপথখি অপেৎপা
লৈরাইগী লৈমুনুংদুদা নোংমা নোংমগী,
য়ামখৎলকই মশিং হামচৎনরকপগী,
হেনগৎলকই পূমথরকপা লমজা সরাশিংদো ।
শাগৎলকপা খুদিংগী হৌন্দুনা তাউখৎলকই হাপচৎনরবা মবুক য়াউদ্রবা
কান্নদ্রবা অপুম্বা মনমনা য়োমসিনলবা মকুদুতং তুমিন তুমিন,
অপুম্বা নমথিরবা সিগৈজনশিংদো হৌন্দুনা হৌজিকসু শির ফাউবা
মরূনা য়ুবগুম মাঙশিনলমলে লূরবা পুখ্রিদুগী ঈশিংপুম্বা মচিন মনাউগী
নমথি হাংঙৈনা ।
৫. চাংয়েং
শিদহীদাককী মঙ মঙলিবা মাশু
চোকথরক্লবা পুংজাদুদদি উনিংলকই অহাংবদো পুমহাং হাংবা অহাংবদো
মহাক য়াউদবা অহাংবদো
তৌন্নিংলকই চাংয়েং অহাংবগী
পুমহাং হাংবা পুমচিক চিকপা অহাংবা
মমিফাউবা উদবা পুমহাং হাংবা অনৌবা মীৎয়েংফম অমা ।
৬. চকসিদা নঙ, নঙকো
পুকচাউবী মসাইগোন্দগী চেন্থোরকপী
শকলোন পুবী মীৎলাউবী হীংচাবী
সেকপীদতা লৈজৌনা সাবৌতদা হীংজৌনা
করিগী থিরক্লি অনৌবা মহাউ
করিগী লামলক্লি মীওইবা খুনাই
নসোং ইফন ফন নকোক ইচাউ চাউ
লাম লামদুনা প্রোক প্রোক সাইরকপা
পুময়োৎ য়োৎসিনলগে মতাগুম মালেমপুম্বা ।
থিদে হিন্দুগী লাইশঙ
খাক্তে মুসলীমগী মসজিদ
ইশায়ীগী গীরজ্জাদশুনি
সীখকী গুরদ্বারাদশুনি
পুনবু পুনলুরবা থেঙবু থেঙনরুরবা নঙগা
শিংকুপ শানা চপখায়রক্লে পুন্সি পুম্বা
জাৎ কুচু লাইর ইনাকখুন খাক্তনা
নোংপোক নোংচুপ খাৱাঙ পু্ম্বদা ।
কৃস্না,অালহা,যীসু,বুধ গী
খোঙয়াদা ফমপাক্তা খুবামনুঙদা
পুল্লপ পুল্লপ থৌনিরিবা ভক্তশিংগী
হামচৎ হামফোইনরবা থৱাইশিংবু
সুপাই পাইশিনলগা য়োৎশিনলক্লি নঙনা নখয়াৎ লাউনা কাথোক্তুনা গর গর,
অদুগা উংলী মালেমনা বীন্দুমুক্তং চাউনা অনৌবা পুৱারী অমগীদমক চকসিদা।।
৭. ঐগী ইরল্
য়ামখ্রবা ৱাংখ্রবা ইরলশিংসে ঐগী
তোরৈ তোরৈ খুদিংগী তুংশিনলকখিবা,
শন্দোক্লি ইরেপ ইপুম থুম্না
ঙরাংগী ঙসিগী অপুনবা,
অপোকপীনা পীবীরম্বা চবুন চবুন
অপোকপনা পৈশিনলম্বা মরোল মরোল
ইচাশিংনা খোমজিনলকখিবা মপৈ মপৈ
মরুপ মপাংশিংনা হৈথরকখিবা খুজোক খুজোক
ঙম্নমক চাইখায়রি থম্মোয় কাচিন শিন্থুংনা
য়ুম্বুরেম্বনা হোনজিনলকখিবা মতুম মতুম
থাদরকখিবা জোম জোম
লৱাই কোকতোন থুম্না
অহাংবা মচেৎ অমতসু লৈহন্দনা
পুংফুন ফুন্না পৈশিনল্লি
ৱাখলগী লৈমায়দা ঐগী
হয়েংগীসু য়াওনা খোপচিনলক্লি মথং মথং লোইনাইদনা খোগোপ্পা l
৮. ওইহনজনিংদে নঙবুদি দেবদাস
নঙগী নুংশি বাহৈগী
কল্ল সাফু ঈরৈদা,
কঙাউনখ্র বাখলনা হন্জীন হন্জীন
লেপখি ননাক্তা তেমশিংন্দুনা থাদোই চাম্মা চাম্মবু,
লাংজখি ইখৌ মীতাজরুবা থম্মোয়না
নুংশিজখি নংতবু খোয়দাজখি নগুনতবু
উখিদে তাইবঙ কনা, য়েংখিদে শক্তম অতোপ্পা অমা,
নঙতগী আশাদা নঙতগী বাখলদা
ঙাওজখি পুক্নিং লুপচখি পুন্সি নফমদতা।।
থকচখি পেন্না নুংশি অম্রিত্তা্
হুনী খঙনা খঙনা
কাউখি পুম্নমক ময়াক কল্ল মহাউদুদা নুংশিগী
চেৎলম্বা কিরম্বা পুল্লম্বা পুম্বা থাদোকখি নফমদা মনিংতম্না
তৈশিনখিবনিনে থম্মোয়গী লৈজবা মচু পুম্বা নুংশি নঙোন্দা,
চাইশিনখিবনিনে পেন্না থম্মোয়গী নুংঙাইর আশাগী ঈরীকশিংদো ঙম্নমক নফমদা ,
নুংশিজরুবনি ঐনা পামজরুবনি নঙবু মঙলান ফুরা শাদুনা ;
লোইরবা পুন্সিদি কেমহৌরে হাঙলবা খোংচৎতি ওইহৌরে,
খাঙ্ঙুথক্কী শিঙ্গারৈ চোইজাইনরে অহীংগী লিক্লাদা ।
চুরম্লিবা মৈরিদুগী মৈশানা
চাক্লকলে থম্মোয় লকা শীন্থুংনা ঙসিদি
ওনখ্রসনু তাঙ্গোই পুন্সি ঐগী
অদুবুনে চান্নবা ওইজহন্নিংদে নঙবুদি দেবদাস।
নুংশিগী মৈরীদা চাকখিবা
নুংশিবা খুদিংদা পাউখোং ওইখিবা দেবদাসতো।
মৈরীসিনা মৈবাইদবা মফমদুদা ঙাল্লুকো নুংশিবা নঙগী পুন্সিদি লেঙদনা ।l
৯. কন্নীঙ
থেংনরুই ইরানগী সহা অমা
কাপথোরকপা মৈগী চীংগুম
নোংমা সন্ধ্যা অমদা,
মরৈ মরৈ তারবা লিলহাগুম্লবা মহাক্কী বাহৈশিংদুনা
শ্রিত শ্রিত পায়থোরক্তুনা চিক্লকই
অফং অফংবা তান্জাদা ঐগী,
"নখোয়গী স্নালৈবাক্কী চাউবা তোম্বা মোমোন
শকহেনবী সখি নিংথিবী মোহিনী
কন্নীঙনি কন্নীঙ লোয়নমক কন্নীঙ,
মরমদি
অরোইবা চেংজেলগী খোঙ কোনখিবা চাউবা
অহকপা চৈরাক্তগী ঙাকথোকহন্নবা খোঙয়াগী উফুল লৌখিবা তোম্বা
অহোঙবা খোঙথাংগী মকোক নোন্দুনতা থোঙজিন্দা লেপখিবা মোমোন
অনৌবা ফমথোলগী কাঙ খোনজেলগুম নাকোংদা ঙংদুনতা লৈখিবী সখি
অচানবী ফমথোন পামজবী মোহিনী,
হয়ীং খোইয়াম্বীগুম ইনাক্তা ঙোরোং ঙোরোং য়োমলম্বশিংদো
ঙসিদি লোয়না অমুবা অনোক অমমম উপশিন্নখ্রে ঐনা ফম তারবা তুঙশিদা " ।
"সিদি সত্রগল ফোর একজিসতেন্সনি
স্নালৈবাকতদা নত্তে
মালেমগী থিঅরিনি "
থোমজিনখি ঐনা ঊনপাক মতুম অমা ।।
১০. চিংশিনলক্লিবা লৈই
নক্নখ্রবা শত্তম অনিদুগী মরক্তা
চিংশিনলক্লি লৈই অমা ফৈগাক ফৈনা
মশক ইশক উনা উনা ।
মশেন মরাংলকই নোংমা নোংমগী
কুচু কুমেন শকওং শদা নাকল অনিগী
পৌখতলকপা খুদিং লৈইগী মপোপনা
হোরকই চেকখায়রকই অনিগী মরক্তা তপ্না তপ্না।
ঙাইরি নাকল অনিদা শক্তম অনিদুনা
অরোইবা পুংফম অরোইবা বারেপ তুমিন তুমিন তুমিন তুমিন।
%5B1%5D.JPG)
.JPG)
